Սպիտակ տունը հայտարարել է, որ բոլոր ռուսներին Վլադիմիր Պուտինի գործողությունների համար պատասխանատվության ենթարկելն արդյունավետ միջոց չի համարում: Այս մասին «Դոժդ» հեռուստաալիքին տված հարցազրույցում հայտարարել է Միացյալ Նահանգների ազգային անվտանգության խորհրդի ռազմավարական հաղորդակցությունների համակարգող Ջոն Քիրբին` մեկնաբանելով ԱՄՆ դիրքորոշումը՝ կապված Ռուսաստանի Դաշնության քաղաքացիների համար շենգենյան վիզաների տրամադրման սահմանափակումներ մտցնելու Եվրամիության ծրագրերի հետ։ 

Վաշինգտոնը կարծում է, որ ՌԴ կառավարության անդամների, օլիգարխների և Ուկրաինա ներխուժման հետ անմիջականորեն կապված այլ անձանց համար ԵՄ և ԱՄՆ մուտքի անհատական արգելքները արդյունավետ միջոց են դարձել այդ երկրի նախագահ Պուտինի և նրա շրջապատի դեմ, ասել է Քիրբին: 

Նա ընդգծել է, որ Արևմուտքն այժմ չի կարող Ռուսաստանի հետ հարաբերություններ զարգացնել այնպես, կարծես ոչինչ չի եղել, սակայն հասարակ ռուսները չպետք է տուժեն դրա պատճառով։ 

«Սա չպետք է վերածվի պատերազմի բոլոր ռուսների դեմ»,- ասել է Ջոն Քիրբին։ 

Ուկրաինայում լայնամասշտաբ պատերազմի սկսվելուց ի վեր արևմտյան երկրները սկսել են մուտքի սահմանափակումներ մտցնել ռուս պաշտոնյաների, քաղաքական գործիչների և գործարարների համար։ ԵՄ որոշ երկրներ, այդ թվում՝ Չեխիան և Լատվիան, դադարեցրել են զբոսաշրջային շենգենյան վիզաների տրամադրումը Ռուսաստանի քաղաքացիներին։ Ներխուժումը սկսելուց մի քանի ամիս անց ԵՄ որոշ երկրներ կոչ արեցին համաեվրոպական արգելք սահմանել: Ուկրաինայի նախագահ Վլադիմիր Զելենսկին նույնպես կոչ է արել սահմանափակել ռուսների մուտքը Եվրամիություն։