Ադրբեջանի ԱԳՆ մամուլի ծառայության վարչության պետ Այխան Հաջիզադեն մեկնաբանել է Հայաստանի Անվտանգության խորհրդի քարտուղար Արմեն Գրիգորյանի վերջին հայտարարությունը։
Նա, մասնավորապես, հերթական անգամ հնչեցրել է այն թեզը, թե Հայաստանը մանիպուլացնում է, ինչը խոչընդոտում է խաղաղության համաձայնագրի բանակցային գործընթացին, ինչից ենթադրել է, որ Հայաստանը շահագրգռված չէ տարածաշրջանում խաղաղության հաստատմամբ։
Նա նաև հայտարարել է, թե Հայաստանը, հակառակ միջազգային իրավունքի նորմերին ու սկզբունքներին, ինչպես նաև Պրահայի և Սոչիի պայմանագրերին, որոնց համաձայն՝ երկրները փոխադարձաբար ճանաչում են միմյանց տարածքային ամբողջականությունն ու ինքնիշխանությունը, "դեռևս չի հրաժարվել Ադրբեջանի դեմ տարածքային պահանջներից", ու որակել Արմեն Գրիգորյանի երեկվա հայտարարությունը "Ադրբեջանի ներքին գործին խառնվել"։