Русский
Վերջին մեկուկես տարվա ընթացքում ամերիկացի բանակցողները փորձել են Կիեւին դրդել կապիտուլյացիայի Ռուսաստանի ղեկավար Վլադիմիր Պուտինի թելադրած պայմաններով, սակայն Ուկրաինան չի հանձնվել՝ շնորհիվ Եվրոպայի աջակցության․ այս մասին հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը Ստրասբուրգում Եվրախորհրդարանի լիագումար նիստի ժամանակ։
«Թեև ամերիկացի բանակցողները գրեթե երկու տարի՝ կամ, ավելի ճշգրիտ ասած, վերջին մեկուկես տարվա ընթացքում փորձում են Ուկրաինային դրդել կապիտուլյացիայի, Ուկրաինան չի համաձայնել կապիտուլյացիայի ենթարկվել Պուտինի պայմաններով, քանի որ Եվրոպան աջակցել է նրան»,- հայտարարել է Կալլասը։
Նա ընդգծել է, որ Եվրոպան պետք է շարունակի աջակցել Ուկրաինային՝ նշելով, որ այլ տարբերակ պարզապես չկա։
ԵՄ գլխավոր դիվանագետն ասել է, որ դեռևս 2026 թվականի փետրվարին ԵՄ արտաքին գործերի նախարարներին ներկայացրել էր խաղաղ բանակցություններին մասնակցելու «իսկապես մաքսիմալիստական ծրագիր»։
«Եթե Ռուսաստանը ներկայացնում է իր մաքսիմալիստական պահանջներն ու ցանկությունները, ապա մենք նույնպես պետք է սեղանին դնենք մեր մաքսիմալիստական պահանջները՝ այսպես ասած, հավասարակշռելու համար բանակցությունները»,- շարունակել է ԵՄ դիվանագիտության ղեկավարը։
Ըստ Բարձր ներկայացուցչի՝ Ռուսաստանը, ի թիվս այլ հարցերի, շահագրգռված է պատժամիջոցների վերացմամբ, սակայն նման հարցերի վերաբերյալ որոշումները Եվրոպայի իրավասության շրջանակներում են, և որ Եվրոպան պետք է ներկայացված լինի բանակցային սեղանի շուրջ։
«Սակայն մենք պետք է շատ ու շատ հստակ հայտարարենք, որ Ռուսաստանի նկատմամբ նույնպես պահանջներ ունենք։ Մենք այս ամենը անվճար չենք տալիս, քանի որ խոսքը միայն խաղաղության հասնելու մասին չէ, այլ այն բանի, որ այդ խաղաղությունը լինի տևական և արդար»,- ընդգծել է Կայա Կալլասը։