Հարավային Կովկասում տիրող իրավիճակը կլինի հիմնական թեման Թուրքիայի արտաքին գործերի նախարար Հաքան Ֆիդանի՝ նոյեմբերի 30-ին Իրան կատարելիք այցի ժամանակ։

Թեհրանում նա բանակցություններ կվարի արտաքին գործերի նախարար Աբբաս Արաղչիի և այլ բարձրաստիճան պաշտոնյաների հետ, նաև կքննարկի Բարձրագույն համագործակցության խորհրդի իններորդ նիստի նախապատրաստական ​​աշխատանքները։

Այցի օրակարգում են անվտանգության և ահաբեկչության դեմ պայքարի հարցերը, տրանսպորտային ուղիների և սահմանային ենթակառուցվածքների զարգացումը։ Կողմերը կքննարկեն երկկողմ առևտրաշրջանառությունը մինչև 30 միլիարդ դոլար հասցնելու քայլերը։

Տարածաշրջանային քննարկումները կներառեն Իրանի միջուկային ծրագիրը, Սիրիայում տիրող իրավիճակը և Իսրայելի գործողությունների ազդեցությունը տարածաշրջանային կայունության վրա։ Անկարան մտադիր է ընդգծել Թեհրանի հետ շարունակական երկխոսության կարևորությունը։