Սաուդյան Արաբիան կարող է ստանալ ուրանի հարստացման թույլտվություն ԱՄՆ-ի հետ կնքված առաջիկա միջուկային համաձայնագրի շրջանակներում, հաղորդել է «Associated Press»-ը՝ հղում անելով Կոնգրեսի և զենքի վերահսկողության փորձագետների փաստաթղթերին:

Սա մտահոգություններ է առաջացնում միջուկային տեխնոլոգիաների տարածման վերաբերյալ Վաշինգտոնի և Թեհրանի միջև առկա լարվածության ֆոնին։

Փաստաթղթերի համաձայն՝ Թրամփի վարչակազմը ձգտում է մինչև 20 միջուկային առևտրային համաձայնագրեր կնքել տարբեր երկրների, այդ թվում՝ Սաուդյան Արաբիայի հետ: Թագավորության հետ հնարավոր համաձայնագիրը կարող է միլիարդավոր դոլարներ արժենալ: Համաձայնագրի նախագծում նշվում է, որ համաձայնագիրը «կխթանի ԱՄՆ ազգային անվտանգության շահերը» և կամրապնդի ամերիկյան միջուկային արդյունաբերությունը Չինաստանի, Ֆրանսիայի, Ռուսաստանի և Հարավային Կորեայի մրցակցության ֆոնին, որոնք ակտիվորեն արտահանում են միջուկային էներգիայի տեխնոլոգիաներ։

Փաստաթղթերում մտահոգություն է հայտնվում, որ ԱՄՆ վարչակազմը միգուցե բավարար չափով չի գնահատել Սաուդյան Արաբիային ուրանի հարստացման տեխնոլոգիաների հնարավոր մատակարարման հետ կապված տարածման ռիսկերը։

Համաձայնագրի նախագիծը նախատեսում է երկկողմանի երաշխիքներ Միջազգային ատոմային էներգիայի գործակալության հետ, ներառյալ համագործակցության «ամենազգայուն» ոլորտների՝ հարստացման, միջուկային վառելիքի արտադրության և վերամշակման վերահսկողությունը։ Այնուամենայնիվ, փորձագետները զգուշացրել են, որ նույնիսկ այս երաշխիքների դեպքում Սաուդյան Արաբիայում ցենտրիֆուգների առկայությունը կարող է ստեղծել ապագա ռազմական միջուկային ծրագրի ներուժ։

AP-ն հաղորդել է, որ միջուկային համագործակցության նախաձեռնությունը առաջ է շարժվում այն ​​ժամանակ, երբ Թրամփը մեծացնում է ճնշումը Իրանի վրա և բարձրացնում ռազմական գործողությունների հնարավորությունը Թեհրանի միջուկային ծրագրի վերաբերյալ նոր գործարքի բացակայության դեպքում։