Երեքշաբթի օրը միլիրդատեր Իլոն Մասկն Օքլենդի (Կալիֆոռնիա) դաշնային դատարանում որպես առաջին վկա ցուցմունքն է տվել OpenAI ԱԻ կազմակերպության դեմ իր միլիարդանոց դատական ​​հայցի շրջանակներում։

OpenAI-ի դեմ վճիռը կարող է վերաձևավորել աշխարհի ամենաարժեքավոր մասնավոր ընկերություններից մեկի վերահսկողությունը, գրել է Axios-ը։

Մասկը դատարանից խնդրում է իրավական սահմանափակումներ դնել OpenAI-ի բարեգործական հետազոտական ​​լաբորատորիայից արհեստական ​​բանականության սուպերուժ վերափոխելու վրա։

Մասկն ասել է, որ դա շատ պարզ է. «Բարեգործական կազմակերպություն գողանալն ընդունելի չէ»։

Գործը ծագել է Մասկի՝ 2024 թվականի դատական ​​հայցից, որով OpenAI-ի գործադիր տնօրեն Սեմ Ալտմանին, համահիմնադիր և նախագահ Գրեգ Բրոքմանին և Microsoft-ին մեղադրել են ընկերության՝ մարդկությանը օգուտ տալու սկզբնական ոչ առևտրային առաքելությանը դավաճանելու մեջ։

Մասկը համահիմնադրել է OpenAI-ը 2015 թվականին: OpenAI-ն ասել է, որ գործարարը նվիրաբերել է 38 միլիոն դոլար, նախքան 2018 թվականին տնօրենների խորհուրդը լքելը:

SpaceX-ի և Tesla-ի գործադիր տնօրենն այժմ ղեկավարում է xAI-ը, որը կազմակերպության անմիջական մրցակից է:

Մասկը փնտրում է համապարփակ միջոցներ, ներառյալ OpenAI-ի կորպորատիվ կառուցվածքի փոփոխություններ, Ալտմանի և Բրոքմանի հեռացում, նաև վնասի փոխհատուցում, որը, նրա խոսքով, պետք է վերադարձվի OpenAI-ի ոչ առևտրային կազմակերպությանը:

Նրա կողմը պոտենցիալ վնասը գնահատել է հարյուրավոր միլիարդների:

OpenAI-ը պնդում է, որ Մասկը մղվում է նախանձից և OpenAI-ից հեռանալու համար ափսոսանքից:

Ընկերությունն ասել է, որ Մասկն OpenAI-ի ոչ առևտրային կազմակերպությանը նվիրաբերել է 38 միլիոն դոլար, որը «ծախսվել է ճիշտ այնպես, ինչպես նախատեսված էր»:

«Սպասեք երկու Իլոնների պատմություն», - իր բացման խոսքում ասել է OpenAI-ի, Ալտմանի և Բրոքմանի շահերը ներկայացնող փաստաբան Ուիլյամ Սավիթը:

Microsoft-ի շահերը ներկայացնող Ռասել Քոհենը պնդել է, որ Մասկը փոխել է իր կարծիքն OpenAI-ի ոչ առևտրային կարգավիճակի վերաբերյալ միայն ChatGPT-ի հաջողությունից հետո:

Դաշնային դատավոր Իվոն Գոնսալես Ռոջերսը Մասկին և Ալտմանին նախազգուշացրել է իրենց բացման խոսքից առաջ խուսափել սոցիալական ցանցերում կոնֆլիկտը սրելուց։ «Վերահսկեք դատարանից դուրս իրավիճակը սրելուն ուղղված, սոցիալական ցանցերն օգտագործելու ձեր հակումը», - ասաց դատավորը։

Երկուշաբթի օրը Մասկն X-ում հայտարարել էր, որ Ալտմանը և Բրոքմանը «գողացել են բարեգործական կազմակերպություն»՝ մեղադրելով երկուսին էլ անձնական օգուտներ ստանալու մեջ։

Երեքշաբթի օրը դատարանում Մասկը մեղադրել էր մյուս կողմին։ «Միայն այն բանից հետո, երբ նրանք շատ հրապարակայնորեն գրառումներ արեցին այս գործի մասին, միայն այդ ժամանակ ես արձագանքեցի», - ասել է նա։

OpenAI-ը նաև ենթարկվում է քննության Մասկի գործից դուրս։

Ֆլորիդայի գլխավոր դատախազ Ջեյմս Ութմայերը անցյալ շաբաթ քրեական հետաքննություն է սկսել OpenAI-ի և ChatGPT-ի դեմ, այն բանից հետո, երբ դատախազները վերանայել են Ֆենիքս Իկների՝ 2025 թվականի Ֆլորիդայի պետական ​​համալսարանի կրակոցների մեջ մեղադրվողի հետ կապված զրույցները։ Դատավարությունը կտևի մոտ չորս շաբաթ։