ՆԱՏՕ-ի անդամ Ռումինիայի պաշտպանության նախարարությունը քննարկում է իսրայելական Elbit Systems ընկերությունից Watchkeeper X անօդաչու թռչող սարքերի գնման պայմանագիրը չեղարկելու հարցը՝ տարիներ շարունակ ձգձգումներից և մատակարարումների լիակատար բացակայությունից հետո, գրել է Hotnews-ը։

Ռումինիան 2022 թվականին ստորագրել է շրջանակային համաձայնագիր՝ մոտավորապես 440 միլիոն դոլարով ձեռք բերելու յոթ Watchkeeper X անօդաչու թռչող սարքերի համակարգ՝ յուրաքանչյուրը գետնային կառավարման կայանով և երեք անօդաչու թռչող սարքով, ընդհանուր առմամբ 21 անօդաչու թռչող սարք։ Առաջին ածանցյալ պայմանագիրը կնքվել է 2023 թվականին՝ առաջին միավորների 24 ամսվա մատակարարման ժամկետով, այսինքն՝ 2025 թվականի ամռանը։