Ֆրանսիան կարևոր դեր է խաղացել այսպես կոչված B պլանի առաջխաղացման մեջ Եվրոպական խորհրդի գագաթնաժողովում՝ ապահովելով դրա հաստատումը որպես Ուկրաինայի սառեցված ակտիվների միջոցով ֆինանսավորման Եվրահանձնաժողովի առաջարկած մեխանիզմի այլընտրանք, հաղորդել է Politico-ն՝ հղում անելով աղբյուրների:

Աղբյուրի համաձայն՝ Ֆրանսիայի նախագահ Էմանուել Մակրոնը ակտիվորեն մասնակցել է բանակցություններին ու վճռորոշ պահին ուժերի հավասարակշռությունը թեքել է երկրորդ տարբերակի օգտին՝ հիմնված համատեղ վարկավորման և ԵՄ բյուջետային ռեսուրսների օգտագործման վրա: Ֆրանսիական կողմը «կուլիսներում» աշխատել է մի քանի երկրների, այդ թվում՝ Հունգարիայի հետ՝ այլընտրանքային լուծման արգելափակումը կանխելու համար:

Գագաթնաժողովի ընթացքում Մակրոնը բանակցություններ է վարել Հունգարիայի վարչապետ Վիկտոր Օրբանի հետ: Ֆրանսիայի դիրքորոշումը վճռորոշ է դարձել այն բանից հետո, երբ մի քանի առաջնորդներ, այդ թվում՝ Իտալիայի վարչապետ Ջորջիո Մելոնին, քննադատել են ռուսական ակտիվների բռնագրավման նախնական ծրագիրը: Մակրոնի գործողությունները, այդ թվում՝ Ռուսաստանի հետ երկխոսության անհրաժեշտության մասին նրա հայտարարությունները, վկայում են, որ նա ձգտում է վերադառնալ ուշադրության կենտրոն Գերմանիայի կանցլեր Ֆրիդրիխ Մերցի կողմից մի քանի ամիս եվրոպական արտաքին քաղաքականությունը ղեկավարելուց հետո, նշել է Politico-ն։

ԵՄ գագաթնաժողովն ավարտվել էր ուրբաթ վաղ առավոտյան՝ 17 ժամ տևած քննարկումներից հետո, որոնք չկարողացան հաղթահարել Բելգիայի դիմադրությունն ու համաձայնության գալ ռուսական ակտիվների բռնագրավման վերաբերյալ։