Русский
Արխիվային լուսանկար
Հալեպում իրավիճակը գնալով սրվում է, ինչպես հայտնում են լրատվամիջոցները, քրդերի գլխավորած «Սիրիայի դեմոկրատական ուժերի» (ՍԴՈւ) կողմից քաղաքի բնակելի թաղամասերի և տարբեր տարածքների վրա հարձակումներ են եղել, որոնք հանգեցրել են քաղաքացիական բնակչության շրջանում զոհերի և լայնածավալ նյութական վնասների։
«Իրավիճակը շատ ծանր է Հալեպում: Հազարավոր մարդիկ երեկ լքել են իրենց բնակավայրերը, ապաստանել ավելի ապահով գյուղերում: Ամեն ինչ շատ տխուր է: Ես իմ ընտանիքով պետք է Ամանորից հետո տեղափոխվեի Հայաստան, չհասցրեցինք, օդանավակայանն այս պահին փակ է անորոշ ժամանակով»,- MediaHub-ի հետ զրույցում նշեց Հալեպի հայ համայնքի ներկայացուցիչ Գևորգ Ճոսլակեանը:
Ըստ հայ համայնքի ներկայացուցչի՝ ընդամենը կարճ ժամանակվա ընթացքում Հալեպը հայտնվեց պատերազմի ճիրաններում:
«Մենք մեծ հույս ունեինք, որ Ահմեդ ալ-Շարաայի կառավարությունը խաղաղություն կբերի, և սկսել էինք հավատալ որ Սիրիան և Հալեպը նոր վերելք պիտի ապրեն: Ամեն դեպքում զարգացումները դեռ մեր առջևում են»,- հայտնեց Ճոսլակեանը:
MediaHub-ի զրուցակիցը հավելեց, որ տասնամյակների պատերազմի հետևանքով սոցիալ-տնտեսական իրավիճակը ծանր է, Սիրիայի բնակչության մեծ մասը չի կարողանում բավարարել իր նվազագույն կենսական պահանջները։
Հիշեցնենք, որ Սիրիայի անցումային կառավարության ուժերի և քրդական «Սիրիայի դեմոկրատական ուժերի» միջև շարունակվում են բախումները, հատկապես Հալեպում: Տարածաշրջանում վերջին օրերին ինտենսիվ մարտեր են, բնակչության տեղահանություն է տեղի ունենում։
Մարտերը շատ մոտ են Հալեպի հայկական կամ քրիստոնեական թաղամասերում: Հայերի շրջանում զոհեր չկան, սակայն իրավիճակը սարսափելի է:
Մարիաննա Արամյան