Թեհրանի հեղափոխական դատարանը իրանցի կինոռեժիսոր Ջաֆար Փանահիին դատապարտել է հինգ տարի և մեկ ամիս ազատազրկման։ Նրան նաև արգելվել է երկու տարի ժամկետով օգտվել սոցիալական ցանցերից կամ մեկնել արտասահման․ գրել են ԶԼՄ-ները։

Նրա ունեցվածքը նույնպես պետք է բռնագրավվի։

Դատավճիռը, որը կայացվել է ռեժիսորի բացակայությամբ, հրապարակել է նրա փաստաբան Մոստաֆա Նիլին։ Ըստ Նիլիի՝ անցյալ շաբաթ Փանահիի բանկային հաշիվներն առանց նախազգուշացման սառեցվել են։ Երբ փաստաբանը դիմել է դատախազություն՝ պատճառը պարզելու համար, նրան տեղեկացրել են դատարանի որոշման մասին։ Կինոռեժիսորին առաջադրված կոնկրետ մեղադրանքները չեն հրապարակվել։ Նիլիի տվյալներով՝ իր պաշտպանյալի նկատմամբ այժմ ևս երեք քրեական գործ կա հարուցված։

Փանահին բնակվում է Իրանից դուրս։ Սակայն 2026 թվականի մարտի 30-ին ռեժիսորը վերադարձել է հայրենիք Լոս Անջելես կատարած այցից հետո, որտեղ նա եղել էր «Օսկար» մրցանակաբաշխությանը։ Նրա «Պարզ պատահար» ֆիլմն առաջադրված է եղել «Լավագույն միջազգային գեղարվեստական ​​ֆիլմ» և «Լավագույն օրիգինալ սցենար» անվանակարգերում։

Մարտին Փանահին բացատրել է Իրան վերադառնալու իր որոշումը՝ նշելով հայրենիքում ապրելու և աշխատելու անհրաժեշտությունը չնայած ազատազրկման սպառնալիքին։ «Ես այնպիսի մարդ եմ, ով պետք է լինի իր երկրում։ Միայն այնտեղ կարող եմ շնչել և աշխատել։ Եվ եթե ուզում են ինձ բանտարկել, թող բանտարկեն։ Ոչինչ չի փոխի վերադառնալու իմ որոշումը»,— ասել է ռեժիսորը Variety-ին տված հարցազրույցում։

2022 թվականին Փանահին յոթ ամսով կալանավորվել էր կապված բողոքի ակցիաների հետ, որոնց նա մասնակցել էր այլ իրանցի կինոգործիչների հետ միասին։ 2025 թվականին նրա «Պարզ պատահար» ֆիլմն արժանացել էր Կաննի կինոփառատոնի գլխավոր մրցանակին՝ «Ոսկե արմավենու ճյուղին»։ Փանահիի մեկ այլ ֆիլմ՝ «Տաքսի Թեհրան»-ը, 2015 թվականին Բեռլինի միջազգային կինոփառատոնում արժանացել է «Ոսկե արջ» մրցանակի։