Խանութի «Գնված ապրանքը հետ չի ընդունվում» գրությունն օրենքի խախտում է, բայց դեղատան դեպքում խնդիրը կարգավորվում է «Դեղերի մասին» ՀՀ օրենքով։

Օրենքի 25-րդ հոդվածի 7-րդ մասի համաձայն՝ պատշաճ որակի դեղը վաճառվելուց հետո փոխարինելու կամ հետ վերցնելու ենթակա չէ, իսկ նորմի խախտումն առաջացնում է վարչական պատասխանատվություն։

«Սպառողների իրավունքների պաշտպանության մասին» օրենքի 23-րդ հոդվածի համաձայն՝ սպառողն իրավունք ունի պատշաճ որակի ոչ պարենային ապրանքը վերադարձնել կամ փոխարինել 14 օրվա ընթացքում։

23-րդ հոդվածի 2-րդ մասով սահմանված են բացառություններ, որոնց «գ» կետով պատշաճ որակի ապրանքը չի կարող վերադարձվել կապարակնքված ապրանքների վաճառքի դեպքում, որոնք վերադարձման ենթակա չեն առողջապահական կամ հիգիենիկ նկատառումներից ելնելով, և որոնք մատակարարվելուց հետո ապակապարակնքվել են գնորդի կողմից։

Արգելքը վերաբերում է միայն պատշաճ որակի դեղին։ «Դեղերի մասին» օրենքի 23-րդ հոդվածի 2-րդ մասով արգելվում է իրացնել՝

Հայաստանում չգրանցված դեղերը,
որակի պահանջներին չհամապատասխանող դեղերը,
պիտանիության ժամկետն անցածդեղերը,
դեղեր, որոնց գրանցումն ուժը կորցրած է ճանաչվել կամ կասեցվել,
դեղեր, որոնց շրջանառությունը դադարեցվել է (հետ է կանչվել).
օրենսդրության խախտմամբ ներմուծվածև կեղծ դեղերը։

Դեղատոմսում նշվածից տարբերվող դեղ բաց թողնվելու դեպքում այն պատշաճ որակի չի համարվում, և 25-րդ հոդվածի 7-րդ մասի արգելքը դրա վրա չի տարածվում։

Օրենքի 19-րդ հոդվածի 3-րդ մասով դեղատները պատասխանատվություն են կրում այդտեղ պատրաստած դեղերի որակի, փաթեթավորման, պիտակավորման ճշտության, ինչպես նաև պատշաճ պահպանման և բաց թողնման համար։

Օրենքի 17-րդ հոդվածի 10-րդ մասի համաձայն՝ սպառողները կարող են լիազոր մարմնի սահմանած կարգով լիազոր մարմին հայտնել դեղերի արդյունավետության բացակայության, սխալ օգտագործման և կեղծված լինելու կասկածի մասին։ Նույն հոդվածի 5-րդ մասով դեղերի կողմնակի ազդեցությունների մասին կարող է հայտնել ցանկացած անձ։

Ըստ 2026 թվականի հուլիսի 3-ի ՀՕ-343-Ն օրենքում կա «հսկիչ գնում» հասկացություն՝ դեղերի շրջանառության ոլորտում վերահսկողություն իրականացնող տեսչական մարմնի կողմից խախտումները բացահայտելու նպատակով կատարվող գնում (3-րդ հոդվածի 1-ին մասի 57-րդ կետ)։

2026 թվականի հուլիսի 3-ի ՀՕ-326-Ն օրենքով 25-րդ հոդվածին ավելացած 15-րդ և 16-րդ մասերով, եթե 23-րդ հոդվածի 2-րդ մասի պահանջներից որևէ մեկը մեկ տարվա ընթացքում նորից խախտվի, դեղատնային գործունեության լիցենզիան կասեցվում է երկամսյա ժամկետով, իսկ կասեցման ժամկետի ավարտից հետո մեկ տարվա ընթացքում կրկին խախտվելու դեպքում լիցենզիան դադարեցվում է։