Թուրքիայի պաշտպանության նախարարության մամուլի և հանրության հետ կապերի վարչության խորհրդական և նախարարության խոսնակ, բրիգադի ծովակալ Զեքի Աքթյուրքը հայտնել է, որ դեկտեմբերի 15-ին Սև ծովից Թուրքիայի օդային տարածքին մոտեցող անօդաչու թռչող սարք (ԱԹՍ) է հայտնաբերվել և գործող կանոնակարգերի շրջանակում՝ խոցվել F-16 կործանիչների կողմից։

Վերջինիս խոսքով՝ միջադեպից հետո իրականացվել են որոնման և տեխնիկական ուսումնասիրության աշխատանքներ, իսկ ռազմաօդային պաշտպանության համակարգի խոցելիության մասին տարածվող պնդումները չեն համապատասխանում իրականությանը։

Ըստ Թուրքիայի ՊՆ ներկայացուցչի՝ Ուկրաինա–Ռուսաստան շարունակվող պատերազմի պայմաններում Սև ծովի անվտանգությանը սպառնացող նման միջադեպերի առնչությամբ երկու կողմերին փոխանցվել է զգուշացում՝ առավել զգոն լինելու անհրաժեշտության մասին։

Բացի այդ, Աքթյուրքն անդրադարձել է Սիրիայում տիրող իրավիճակին և նշել, որ Թուրքիան աջակցում է Սիրիայում «Մեկ պետություն, մեկ բանակ» սկզբունքին և շարունակում է սերտ համագործակցությունը Դամասկոսի կառավարության հետ՝ «Սիրիայի դեմոկրատական ուժերի» (SDG) ինտեգրման գործընթացի շուրջ։