Ֆրանսիայի ֆինանսների նախարար Ռոլան Լեսկյուրը «Financial Times»-ին ասել է, որ ինքը զգուշացրել է իր ամերիկացի գործընկեր Սքոթ Բեսենտին, որ ԱՄՆ-ի՝ Գրենլանդիան գրավելու ցանկացած քայլ համարժեք կլինի «սահմանները հատելուն», ինչը կվտանգի Եվրոպայի և ԱՄՆ-ի միջև տնտեսական հարաբերությունները։

«Գրենլանդիան ԵՄ-ի մաս կազմող ինքնիշխան երկրի ինքնիշխան մասն է։ Սա չպետք է խառնել», - ընդգծել է Լեսկյուրը FT-ին տված հարցազրույցում։

Նա ասել է, որ չնայած ԱՄՆ ներկայիս վարչակազմի հետ բազմաթիվ հարցերի շուրջ անհամաձայնություններին, Եվրոպան դեռ պետք է համագործակցի Վաշինգտոնի հետ «համատեղ առաջնահերթությունների» շուրջ, ինչպիսին է G7 նախաձեռնությունը՝ Չինաստանից կախվածությունը նվազեցնելու նպատակով՝ հազվագյուտ մետաղների համար։

«Երբ մենք համաձայն չենք, միշտ ավելի լավ է մնալ ներգրավված, և դա է, ինչ մենք անում ենք: Երկխոսությունը պետք է շարունակվի մինչև չանցնենք սահմանները, որոնք չպետք է հատել», - ասաց Լեսկյուրը՝ նշելով, որ ԱՄՆ-ն ու Ֆրանսիան 250 տարի սերտ դաշնակիցներ են եղել։

Ֆրանսիայի ֆինանսների նախարարը Գրենլանդիայի վերաբերյալ ԱՄՆ ծրագրերը մեջբերում է որպես վերջին օրինակ այն բանի, թե որքան դժվար է դարձել Վաշինգտոնի հետ գործ ունենալը Դոնալդ Թրամփի՝ Սպիտակ տուն վերադառնալուց հետո՝ վերջինիս «պարադոքսալ» վարքագծի պատճառով՝ Եվրոպայի դաշնակիցից մինչև հակառակորդ։

Հարցին, թե արդյոք ԵՄ-ն պետք է տնտեսական պատժամիջոցներ կիրառի Գրենլանդիա ԱՄՆ-ի հնարավոր ներխուժման պատճառով, Լեսկյուրը նախընտրել է ուղիղ չպատասխանել. «Ակնհայտ է, որ եթե դա տեղի ունենար, մենք անպայման կհայտնվեինք բոլորովին նոր աշխարհում, և մենք ստիպված կլինեինք համապատասխանաբար հարմարվել»։

FT-ն նշել է, որ տվյալների համաձայն՝ ԵՄ-ն ներկայումս աշխարհում ամենամեծ առևտրային հարաբերություններն ունի Միացյալ Նահանգների հետ։ Ապրանքների և ծառայությունների երկկողմ առևտրի ընդհանուր ծավալը 2024 թվականին գերազանցել է 1.6 տրիլիոն եվրոն: Միացյալ Նահանգները ԵՄ ամենամեծ արտահանման շուկան է։