Русский
Եվրոպան այժմ գործ ունի ԱՄՆ նախագահ Դոնալդ Թրամփի վարչակազմի հետ, որը «բացահայտորեն հակաեվրոպական է», «արհամարհում է» ԵՄ-ն և «ցանկանում է այն քանդել», Ելիսեյան պալատում լրատվամիջոցներին, այդ թվում՝ «Financial Times»-ին, ասել է Ֆրանսիայի նախագահ Էմանուել Մակրոնը։
Մակրոնը զգուշացրել է, որ ԵՄ-ն չպետք է իրեն ապահով զգա՝ հավատալով, որ Գրենլանդիայի և առևտրային պատերազմի շուրջ ամերիկյան լարվածությունն անցել է։
«Մենք առևտրային ճակատում ականատես ենք լինում չինական ցունամիի, և անկայունությունը զգացվում է Ամերիկայում ամեն րոպե։ Այս երկու ճգնաժամերը խորը ցնցում են՝ շրջադարձային կետ եվրոպացիների համար», - ասել է Ֆրանսիայի նախագահը։
Նա նաև նշել է, որ Թրամփի հետ իր հարաբերություններում միշտ եղել է հարգալի, բայց ոչ թույլ։ Մակրոնը նաև անիրագործելի է համարել ԵՄ-ի «խոնարհվելու և համաձայնության հասնելու փորձերի» ռազմավարությունը։
Մակրոնը կոչ է արել ԵՄ առաջնորդներին այս շաբաթ բելգիական ամրոցում կայանալիք գագաթնաժողովն օգտագործել տնտեսական բարեփոխումներին նոր էներգիա հաղորդելու համար՝ դաշինքի մրցունակությունը խթանելու և համաշխարհային ասպարեզում Չինաստանին և Միացյալ Նահանգներին դիմակայելու կարողությունը ամրապնդելու համար։
«Երբ կա ագրեսիայի հստակ ակտ, կարծում եմ, որ մենք պետք է չխոնարհվենք կամ չփորձենք հասնել կարգավորման», - երեքշաբթի օրը հրապարակված մեկնաբանություններում ասել է Մակրոնը:
«ԱՄՆ-ն առաջիկա ամիսներին, դա հաստատ է, կհարձակվի մեզ վրա թվային կարգավորման հարցում»,- ընդգծել է Ելիսեյան պալատի ղեկավարը՝ զգուշացնելով նախագահ Դոնալդ Թրամփի կողմից ԱՄՆ ներմուծման հնարավոր մաքսատուրքերի մասին, եթե ԵՄ-ն օգտագործի իր «Թվային ծառայությունների մասին» օրենքը՝ տեխնոլոգիական ընկերությունները վերահսկելու համար։
«Աշխարհի շուկաները գնալով ավելի զգուշանում են ԱՄՆ դոլարից։ Նրանք այլընտրանքներ են փնտրում։ Եկեք նրանց առաջարկենք եվրոպականը», - նշել է Մակրոնը՝ հավելելով, որ Եվրոպայի ժողովրդավարական ինստիտուտները մեծ ակտիվ էին ներդրողների համար այն ժամանակ, երբ ԱՄՆ-ն «հեռանում էր օրենքի գերակայությունից»։