Միացյալ Նահանգների հարթավայրային շրջանների և Միջին Արևմուտքի գրեթե 50 միլիոն բնակիչ կիրակիից երկուշաբթի վտանգավոր եղանակային երևույթների, այդ թվում՝ տորնադոների պատճառով գտնվում է բարձր զգոնության վիճակում, հայտնում է ABC News-ը։

Խիստ եղանակային պայմանների մասին նոր նախազգուշացումները հրապարակվել են հանգստյան օրերին Միսիսիպիի և Տեխասի որոշ հատվածներում գրանցված ավերիչ փոթորիկներից և բազմաթիվ պտտահողմերից հետո։ Տեխասի Ուայզ շրջանի պաշտոնյաների հաղորդմամբ, շաբաթ օրը Ռանըուեյ Բեյում ուժեղ փոթորիկների հետևանքով մեկ մարդ է զոհվել, ևս մի քանիսը ստացել են վնասվածքներ։

Տարածքով անցած հզոր ամպրոպն ուղեկցվել է բեյսբոլի գնդակի չափի կարկուտով և քամու վտանգավոր պոռթկումներով։ Նույն ամպրոպը նաև առնվազն երկու ենթադրյալ տորնադոյի պատճառ է դարձել։ Փոթորիկը զգալի կառուցվածքային վնասներ է հասցրել Ռանըուեյ Բեյի մի քանի թաղամասերի, ինչի հետևանքով առնվազն 20 ընտանիք ստիպված է եղել լքել իր տունը։

Շաբաթ երեկոյան հարթավայրային և հարավարևմտյան շրջաններում արձանագրվել է տորնադոյի առնվազն 12 չհաստատված դեպք, որոնցից հինգը՝ Տեխասում, վեցը՝ Օկլահոմայում և մեկը՝ Նեբրասկայում։

Կիրակի օրը Կանզասի մեծ մասում, ինչպես նաև Միսուրիի արևմտյան և Նեբրասկայի հարավարևելյան որոշ հատվածներում կանխատեսվում է խիստ եղանակային պայմանների 3-րդ աստիճանի «բարձր ռիսկ» (5-ից)։ Հնարավոր են տորնադոներ, ուժեղ քամի և խոշոր կարկուտ։

Երկուշաբթի եղանակային վտանգը կտարածվի դեպի հյուսիս-արևելք՝ Միսիսիպի գետի ստորին հոսանքից մինչև Միջին Արևմուտք։ Սպասվում են նաև տեղատարափ անձրևներ, որոնք կարող են հանգեցնել առանձին հանկարծակի հեղեղումների, հատկապես Մեծ լճերի շրջանում։