Իրանի դեմ ռազմական գործողությունների դադարեցման որոշումը կկայացվի Իսրայելի վարչապետ Բենիամին Նեթանյահուի մասնակցությամբ, «The Times of Israel»-ին տված հարցազրույցում հայտարարել է ԱՄՆ նախագահ Դոնալդ Թրամփը։

Թրամփն ասել է, որ քննարկում է իրավիճակն Իսրայելի վարչապետի հետ և մտադիր է հաշվի առնել Իսրայելի դիրքորոշումը ռազմական գործողությունների դադարեցման ժամկետները որոշելիս։ Սակայն, ԱՄՆ նախագահը նշել է, որ վերջնական որոշումը կկայացնի Վաշինգտոնը։

ԱՄՆ նախագահը կարծիք է հայտնել, որ եթե ինքն ու Նեթանյահուն չմիջամտեին, Իսլամական Հանրապետությունը կոչնչացներ հրեական պետությունը։ «Իրանը պատրաստվում էր ոչնչացնել Իսրայելը և դրա շուրջն ամեն ինչ։ <...> Մենք միասին աշխատեցինք։ Մենք ոչնչացրինք մի երկիր, որը ցանկանում էր ոչնչացնել Իսրայելը», - նշել է ամերիկացի նախագահը։

Թրամփը նաև ասել է, որ Նեթանյահուն պետք է անհապաղ ներում ստանա։

«Բիբի Նեթանյահուն պետք է անհապաղ ստանա այս ներումը։ Կարծում եմ՝ [Իսրայելի նախագահ Իսահակ Հերցոգը] սարսափելի բան է անում՝ այն չտրամադրելով։ Մենք ուզում ենք, որ Բիբին կենտրոնանա պատերազմի վրա, այլ ոչ թե այս ծիծաղելի ներման վրա», - ասել է Սպիտակ տան ղեկավարը։

Նեթանյահուն մեղադրվում է կաշառակերության, խարդախության և վստահության չարաշահման համար։