ԱՄՆ նախագահ Դոնալդ Թրամփը պաշտոնապես հայտարարել է արտակարգ դրություն՝ Կուբայի իշխանությունների կողմից ներկայացվող սպառնալիքի պատճառով, որոնք, ըստ Սպիտակ տան, համագործակցում են թշնամական երկրների հետ և ապաստան են տրամադրում ահաբեկչական խմբավորումների, այդ թվում՝ «Համասի» և «Հըզբոլլահի» անդամներին:

Վաշինգտոնը պնդում է, որ կղզում շարունակում է գործել Ռուսաստանի ամենամեծ էլեկտրոնային հետախուզական կենտրոնը, որը հավաքում է ԱՄՆ ազգային անվտանգության վերաբերյալ տեղեկատվություն, և որ Հավանայի վարչակազմն ինքն է խաթարում տարածաշրջանային կայունությունը՝ բռնաճնշումների և ազատությունների սահմանափակումների միջոցով:

Գործադիր հրամանագիրը լիազորում է Թրամփին խիստ պատժիչ մաքսատուրքեր սահմանել ցանկացած երկրի դեմ, որը ուղղակիորեն կամ միջնորդների միջոցով նավթ է մատակարարում Կուբա: Այս միջոցառումը նպատակ ունի ստեղծել կղզու լիակատար էներգետիկ շրջափակում՝ Հավանայի իշխանությունների վրա տնտեսական ճնշումը մեծացնելու համար:

Կուբայի արտաքին գործերի նախարար Բրունո Ռոդրիգեսը խստորեն դատապարտել է Վաշինգտոնի գործողությունները՝ դրանք անվանելով նոր սրացում և «ստերի երկար ցանկով» պատժամիջոցների խստացումը արդարացնելու փորձ: Իր հայտարարության մեջ նա ընդգծել է, որ Միացյալ Նահանգները շանտաժի և հարկադրանքի միջոցով ստիպել է այլ երկրներին աջակցել էմբարգոյին, որը ավելի քան 65 տարի ստեղծել է ծայրահեղ կենսապայմաններ կուբացի ժողովրդի համար: Հավանան համոզված է, որ տարածաշրջանում խաղաղության միակ իրական սպառնալիքն ԱՄՆ կառավարության քաղաքականությունն է, որը ձգտում է լիակատար վերահսկողություն հաստատել «Մեր Ամերիկայի» երկրների նկատմամբ։