ԱՄՆ-ը հարվածել է Իրանին, Թեհրանն էլ՝ Պարսից ծոցում ամերիկյան օբյեկտներին: Միացյալ Նահանգների զինուժը Իրանին հասցված նոր հարվածների ժամանակ 80 ռազմական օբյեկտ է թիրախավորել՝ մեղադրելով Թեհրանին համաշխարհային մատակարարումների համար առանցքային Հորմուզի նեղուցում առևտրային նավերի դեմ հարձակումների համար, իսկ իրանական պատասխան հարվածների թիրախում Պարսից ծոցի հարևաններ Քուվեյթում և Բահրեյնում տեղակայված ամերիկյան օբյեկտներն են եղել։

Իրանի զինված ուժերը պատրաստ են հարձակվել Մերձավոր Արևելքում գտնվող ամերիկյան բոլոր բազաների վրա, եթե ԱՄՆ-ը կրկնի հարվածները: «Հրադադարի ռեժիմի կրկնակի խախտման հետևանքներն ԱՄՆ-ի հանցավոր գործողությունների արդյունքն են, ԱՄՆ բոլոր բազաները բանակի անօդաչու թռչող սարքերի օգնությամբ կդառնան հարվածների օրինական թիրախներ»,- ասված է հայտարարության մեջ, որը հրապարակել է IRNA պետական գործակալությունը:

Իրանն ու ԱՄՆ-ը հաջորդ շաբաթ Իսլամաբադում 2-օրյա բանակցություններ կանցկացնեն, եթե չնախատեսված այլ իրադարձություններ չլինեն։ Այս մասին ասել է ՀՀ-ում Իրանի դեսպանը։

Ինչ վերաբերում է ԱՄՆ-ի երեկվա գործողություններին ու դրանց Իրանի պատասխանին, դեսպանն ընդգծեց, որ բանակցությունների շրջանակում նման գործողությունները պետք է դիտարկել որպես մարտավարական, տակտիկական քայլեր, սակայն դրանցով կողմերը չեն հետապնդում լայնամասշտաբ պատերազմ սկսելու միտում։

Ի՞նչ է կատարվում Իրանում, ինչո՞ւ չի ստացվում վերջ դնել ԱՄՆ-Իրան հակամարտությանը․ MediaHub-ը զրուցել է Թեհրանի ATU (Allameh Tabataba'i) համալսարանի դասախոս, միջազգայնագետ Էհսան Մովահեդիանիի հետ։

«Իրանում իրավիճակը նորմալ է, և վերջին հակամարտությունը սահմանափակվում է Իրանի հյուսիսային ափագծերով՝ Հորմուզի նեղուցում և Պարսից ծոցում: ԱՄՆ-ը նպատակ ունի ոչնչացնել Իրանի ռադարային և մոնիթորինգի համակարգերը, որոնք օգտագործվում են Հորմուզի նեղուցը վերահսկելու համար՝ այդ տարածքներին հարվածելով: Այնուամենայնիվ, չնայած Բանդար Աբբասի, Բուշեհրի և մի քանի այլ ափամերձ նավահանգիստների և քաղաքների վրա տասնյակ հարձակումներին, ԱՄՆ-ը չի կարողացել դա անել և չի կարողացել նույնականացնել այն տեղական համակարգերը, որոնք Իրանն օգտագործում է Հորմուզի նեղուցով անցնող նավերը հայտնաբերելու համար»,- ասաց Մովահեդիանին։

Միջազգայնագետը նշեց, որ ըստ էության, վերջերս պարտադրված հակամարտությունից առաջ Հորմուզի նեղուցն ուներ երկու երթուղի: Ծանր նավերն օգտագործում էին հյուսիսային երթուղին, մինչդեռ ավելի մակերեսային խորությամբ նավերը՝ հարավայինը՝ Օմանի ափի մոտ: Ուղևորատար նավերն ու զբոսանավերը նույնպես շրջապատում էին նեղուցի հարավային ափագիծը և անցնում էին այնտեղով: «Իրանն այժմ հղում է կատարում փոխըմբռնման հուշագրի 5-րդ կետին, որտեղ ասվում է. «Այս հուշագիրը ստորագրելուց հետո Իրանը, գործադրելով իր բոլոր ջանքերը, պետք է կազմակերպի առևտրային նավերի անվտանգ անցման համար անհրաժեշտ միջոցները, անվճար, ընդամենը 60 օրվա ընթացքում, Պարսից ծոցից մինչև Օմանի ծով և հակառակը»»։

Թեհրանը պնդում է, որ «անվտանգ անցման» համար «անհրաժեշտ միջոցների» օրինակներից մեկը Թեհրանի կողմից նշանակված երթուղով տարանցման պահանջն է։ Այժմ ամերիկացիները բացել են Հորմուզի նեղուցի հարավային միջանցքով անցնող երթուղի՝ օդային ծածկույթի ներքո, որը, ի դեպ, տեխնիկապես վտանգավոր է։ Նրանք ցանկանում են ստեղծել իրենց սեփական երթուղին Հորմուզի նեղուցում և խանգարել Իրանին կառավարել նավերի անցումը դրանով, որպեսզի Իրանը չկարողանա օգտագործել այս լծակը Միացյալ Նահանգների նկատմամբ առավելություն ստանալու համար»,- նշեց նա։

Միջազգայնագետը հավելեց․ «Ընդհանուր առմամբ, եթե Իրանը անտարբեր մնա ամերիկացիների կողմից Հորմուզի նեղուցում նշանակված երթուղու նկատմամբ և, ինչպես սխալ թույլ տվեց Լեռնային Ղարաբաղի հակամարտության ժամանակ՝ կեղծ Զանգեզուրի միջանցքի վերաբերյալ, զիջի իր մրցակիցների և թշնամիների միջազգային իրավական մեկնաբանություններին, ապա մեծ կորուստներ կկրի։ Այս պատճառով Իրանը պնդում է Հորմուզի նեղուցով նավերի տարանցման վերահսկողության վրա և այս հարցում չի նահանջի ԱՄՆ-ից։ Հաշվի առնելով, որ ԱՄՆ-ը, Հուշագրի ստորագրումից ի վեր, խախտել է դրա բազմաթիվ կետերը և դիմել է Իրանի վրա լայնածավալ հարձակումների, երկու երկրների միջև խաղաղությունն այժմ թվում է խիստ անհավանական, և լարվածությունը միայն կաճի։ Նախ, ԱՄՆ-ը վերացրել է Իրանի նավթային արտոնությունը, ինչը Հուշագրի 10-րդ կետի խախտում է։ Երկրորդը՝ ԱՄՆ-ը փորձում է Օմանի-ամերիկյան միջանցքը ակտիվ պահել Հորմուզի նեղուցում, ինչը խախտում է 5-րդ կետը։ Իհարկե, Իրանի ռազմական արձագանքի պատճառով, նեղուցի այս հատվածով նավերի անցումը դադարեցվել է»։
 
Նա նշեց, որ ԱՄՆ-ը զանգվածաբար տեղափոխում է ռազմական տեխնիկա Պարսից ծոցի հարավային մաս, հարվածում է Իրանին և ոչնչացնում իրանական ռազմական և քաղաքացիական ենթակառուցվածքները, ինչը խախտում է Հուշագրի 1, 2, 9 և 13 կետերը։ ԱՄՆ նախագահը բացահայտորեն սպառնացել է Իրանին իր պաշտոնյաների սպանությամբ և ռազմական հարձակումներով, ինչը խախտում է 1-ին, 2-րդ և 13-րդ կետերը։ Իրանի արգելափակված միջոցներից ոչ մեկը ԱՄՆ-ի կողմից չի տրամադրվել, ինչը խախտում է 11-րդ կետը։
 
Լիբանանում պատերազմը և Իսրայելի հարձակումները այդ երկրի վրա շարունակվում են, ինչը խախտում է 1-ին և 13-րդ կետերը։ Պարսից ծոցի համագործակցության խորհուրդը նույնպես մերժել է Իրանի վերակառուցման համար 300 միլիարդ դոլարի որևէ ներդրում, ինչը խախտում է 6-րդ կետը։

«Հաշվի առնելով այս խախտումները և ԱՄՆ սադրանքները, նրանց նպատակը միայն Պարսից ծոցում իրենց ռազմական կարողությունների վերականգնումն է և էներգետիկ ճգնաժամի ու Ամերիկայում բենզինի ու սննդի բարձր գների մեղմացումը, որպեսզի Հանրապետական ​​կուսակցությունը կարողանա հաղթել դեմոկրատներին առաջիկա Կոնգրեսի ընտրություններում։ Թվում է, թե ԱՄՆ-ը շուտով լայնածավալ պատերազմ կսկսի Իրանի դեմ»,- ասաց Մովահեդիանին։