Կուբան ամբողջությամբ սպառել է վառելիքը, հայտարարել է Էներգետիկայի և հանքերի նախարար Վիսենտե դե լա Օ'Լեւին։

Պաշտոնյայի խոսքով՝ երկիրը չունի ո՛չ մազութ, ո՛չ էլ դիզելային վառելիք, իսկ նավթի և գազի ներքին արտադրությունը բավարարում է միայն ներքին պահանջարկի մի մասը։

Նախարարը նկարագրել է Հավանայի ծայրահեղ ծանր իրավիճակը, որտեղ բնակիչները օրական 20 ժամ էլեկտրաէներգիա չունեն։ Ներկայումս երկրի էլեկտրացանցը գործում է միայն ջերմաէլեկտրակայանների, գազային գեներատորների և արևային էլեկտրակայանների վրա՝ առանց պաշարների։

Կուբան գրեթե վեց ամիս վառելիքի մատակարարում չի ստացել։ Միակ նշանակալի խմբաքանակը ստացվել է ռուսական մարդասիրական օգնության տեսքով։ Այս 100,000 տոննա նավթը թույլ է տվել ժամանակավորապես նվազեցնել անջատումների մասշտաբները։ «Մենք այդ պաշարները երկարաձգեցինք մինչև մայիսի առաջին օրերը, և հիմա վառելիքը սպառվել է», - բացատրել է պաշտոնյան։

Նախկինում հաղորդվել էր, որ Միացյալ Նահանգները փաստացի վառելիքի շրջափակում է կիրառել Կուբայի նկատմամբ՝ մաքսատուրքեր սահմանելով կղզի նավթ մատակարարող երկրներից ներմուծվող ապրանքների վրա։ Թրամփը հույս ունի օգտագործել էներգետիկ շրջափակումը՝ կղզուն ստիպելու փոխել իր կառավարությունը։