Թրամփի վարչակազմի պաշտոնյաները ճնշում են գործադրում ամերիկացի առաջնորդի պատկերով նոր 250 դոլարանոց թղթադրամի ստեղծման վրա, հաղորդում է «The Washington Post»-ը՝ հղում անելով աղբյուրներին։

Եթե նախաձեռնությունը կյանքի կոչվի, Թրամփը կդառնա 150 տարվա ընթացքում առաջին մարդը, որի պատկերը կհայտնվի դոլարանոց թղթադրամի վրա՝ դեռևս կենդանության օրոք։ Հրատարակության տվյալներով՝ գաղափարը խթանում են գանձապետ Բրենդոն Բիչը և նրա խորհրդական Մայք Բրաունը։ Նրանք ճնշում են գործադրում փորագրության և տպագրության բյուրոյի վրա՝ նոր թղթադրամի թողարկումը արագացնելու համար։

WP-ի տվյալներով՝ պաշտոնյաներն արդեն ներկայացրել են մակետներ։ Դրանցից մեկով Թրամփի դիմանկարը 250 դոլարանոց թղթադրամի կենտրոնում է ԱՄՆ նախագահի և ֆինանսների նախարար Սքոթ Բեսենթի ստորագրությունների կողքին։

Էսքիզներից մեկի հեղինակը՝ բրիտանացի նկարիչ Իան Ալեքսանդրը, հաստատել է դիզայնի գոյությունը։ Նա ասել է, որ Թրամփի հետ քննարկել է դիզայնի փոփոխությունները, այդ թվում՝ ամերիկյան դրոշի գույների և Միացյալ Նահանգների հիմնադրման 250-ամյակի լոգոյի ավելացումը։

1866 թվականից ի վեր ոչ մի կենդանի մարդ չի հայտնվել ամերիկյան թղթադրամի վրա։ Սահմանափակումը մտցվել է այն բանից հետո, երբ 5 ցենտանոց թղթադրամի վրա հայտնվել է ֆինանսների նախարարության պաշտոնյայի դիմանկարը։ Անցյալ տարի ԱՄՆ Կոնգրեսում ներկայացվել է օրինագիծ, որը թույլ կտար Թրամփի պատկերը հայտնվել 250 դոլարանոց թղթադրամի վրա՝ երկրի հիմնադրման 250-ամյակի կապակցությամբ, սակայն օրինագիծը երբեք չի ընդունվել։