ԱՄՆ նախագահ Դոնալդ Թրամփը մերժել է Սաուդյան Արաբիայի՝ «Անսար Ալլահ» շարժմանը (հուսիներ) հարվածներ հասցնելու խնդրանքը․ այս մասին հայտնել է Axios-ը՝ վկայակոչելով ԱՄՆ երկու պաշտոնյայի։

Սաուդյան Արաբիայի թագաժառանգ արքայազն Մուհամեդ բեն Սալմանը սեպտեմբերի 10-ին երկու անգամ զանգահարել է Դոնալդ Թրամփին՝ հորդորելով հարձակվել հուսիների վրա։ Սակայն ԱՄՆ նախագահը մերժել է խնդրանքը. վարչակազմը նաև մտադրություն չունի ուղղակիորեն միջամտելու հակամարտությանը։

Ըստ Axios-ի՝ ԱՄՆ-ն մտահոգված է Եմենում արագորեն սրվող հակամարտությամբ և ավելացնում է Սաուդյան Արաբիային ցուցաբերվող աջակցությունը՝ միաժամանակ փորձելով խուսափել մարտական ​​գործողություններին ուղղակի մասնակցությունից։ ԱՄՆ զինվորականներն ու պաշտոնյաները նաև տեղեկացրել են իրենց սաուդցի գործընկերներին, որ Թրամփի հրահանգով ամերիկյան ուժերը պետք է կենտրոնանան Իրանի և Հորմուզի նեղուցի անվտանգության ապահովման վրա՝ խուսափելով նոր ռազմական ճակատ բացելուց։

Դրանից անմիջապես առաջ հուսիները գրավել էին Եմենի արևմտյան ափին Մոխա նավահանգստային քաղաքը և սկսել հարձակումներ իրականացնել Կարմիր ծովում Հանիշ կղզիների ուղղությամբ։ Reuters-ի տվյալներով՝ այս քայլը շարժման զինյալներին ավելի է մոտեցրել Բաբ էլ Մանդեբի նեղուցի նկատմամբ վերահսկողություն հաստատելուն։