Երևանի մի շարք փողոցներում փոսերի խնդիրը կրկին դարձել է վարորդների ու հետիոտների դժգոհության պատճառ։ Քաղաքացիները, չսպասելով պատասխանատուների արձագանքին, ստիպված են սեփական միջոցներով «չեզոքացնել» վտանգավոր հատվածները՝ երբեմն բավականին անսովոր և զվարճալի լուծումներով։

Վերջին օրերին ակտիվ քննարկման թեմա է դարձել մայրաքաղաքի տարբեր վարչական շրջաններում ճանապարհների վիճակը։ Անհարթ ու խորը փոսերը ոչ միայն դժվարացնում են երթևեկությունը, այլ նաև հաճախ դառնում են մեքենաների վնասման պատճառ։

Վարորդները MediaHub-ի հետ զրույցում նշում են, որ հատկապես երեկոյան ժամերին կամ վատ տեսանելիության պայմաններում փոսերը գրեթե աննկատ են, ինչը մեծացնում է վթարների ռիսկը։

«Ահավոր են ճանապարհների փոսերը, դրանք շրջանցելու համար հաճախ հայտնվում եմ վթարային իրավիճակում, բայց չշրջանցելու դեպքում էլ կվնասեմ մեքենաս»,- նշում է վարորդներից մեկը։

Հիշեցնենք, որ Երևանի քաղաքապետարանը ֆեյսբուքյան էջում թեմայի վերաներյալ հայտարարություն էր տարածել․ «Երևանի վարչական շրջաններում շարունակվում են փոսային նորոգման աշխատանքները: Երեկ գիշերային ժամերին փոսալցման աշխատանքներ են իրականացվել հետևյալ հասցեներում՝ Միկոյան փ., Խորենացի փ., Գարեգին Հովսեփյան փ., Դրոյի փ.: Այս գիշեր փոսալման աշխատանք կիրականացվի հետևյալ փողոցներում՝ Արամ, Պուշկին, Կիևյան, Սևակ, Բելինսկի, Բագրատունյաց, Միկոյան, Թևոսյան»։