ԱՄՆ նախագահ Դոնալդ Թրամփն անցյալ ամիս Սենատի փոքրամասնության առաջնորդ, Դեմոկրատ Չակ Շումերին ասել է, որ վերջապես պատրաստ է չեղարկել Նյու Յորքի խոշոր ենթակառուցվածքային նախագծի միլիարդավոր դոլարների ֆինանսավորման սառեցումը, գրել է CNN-ը։

Սակայն եղել է մի պայման. գումարի դիմաց Շումերը պետք է համաձայնվեր Նյու Յորքի «Փենն» կայարանը և Վաշինգտոնի «Դալլես» միջազգային օդանավակայանը վերանվանել Թրամփի անունով։

Զրույցին ծանոթ երկու անձանց կողմից նկարագրված զարմանալի առաջարկը Շումերն արագորեն մերժել է և նախագահին ասել, որ ինքը լիազորություններ չունի կատարելու նման անսովոր խնդրանքը։

Հաջորդող շաբաթների ընթացքում Թրամփը շարունակել է հետաձգել Նյու Յորքն ու Նյու Ջերսին Հուդզոն գետի տակ տեղակայված նոր երկաթուղային թունելով կապող երկար ժամանակ պլանավորված Gateway նախագծի համար նախատեսված ավելի քան 16 միլիարդ դոլարի հատկացումը։

Երկու նահանգներն այժմ դատի են տալիս Թրամփի վարչակազմին՝ այս շաբաթվա սկզբին ներկայացված հայցում պնդելով, որ ֆինանսավորման կասեցումն անօրինական է։ Շումերի խոսնակը հրաժարվել է մեկնաբանություն տալ։ Սպիտակ տունը չի արձագանքել մեկնաբանության խնդրանքին։