Ամերիկյան CNN հեռուստացանցի հայտնի հաղորդավարուհի Քրիստիան Ամանպուրը հայտարարել է, որ 2027 թվականին կհեռանա ընկերությունից։

«Երկար ամիսների խորհրդածություններից և անքուն գիշերներից հետո... ես որոշեցի հեռանալ CNN-ից, որն իմ գործընկերն է եղել 43 հիանալի տարիների ընթացքում՝ ավելի երկար, քան տևում են որոշ ամուսնություններ։ CNN-ով և PBS-ով հեռարձակվող «Ամանպուր» [Amanpour] ամենօրյա հաղորդումն ավարտին կմոտենա այս տարվա վերջին։ Այնուամենայնիվ, CNN-ի հետ պայմանավորվել ենք անցումային փուլի շուրջ, որի ընթացքում հաղորդումը կշարունակի եթեր հեռարձակվել շաբաթը մեկ անգամ՝ մինչև հաջորդ տարվա հունիսը», - նշել է լրագրողն X սոցիալական հարթակում հրապարակված տեսաուղերձում։

Ամանպուրը չի հստակեցրել իր որոշման պատճառները՝ նշելով միայն, որ պատրաստ է նոր նախագծերի, և որ կշարունակի աշխատել փոդքաստի վրա իր նախկին ամուսնու՝ Ջեյմի Ռուբինի հետ։ «Ցավում եմ նրա հեռանալու համար, բայց հասկանում եմ, որ սա ճիշտ պահն է նրա համար՝ թե՛ անձնական, թե՛ մասնագիտական ​​առումով», - ասել է CNN-ի գլխավոր գործադիր տնօրեն Մարկ Թոմփսոնը։

Ամանպուրը, ով ծնվել է Մեծ Բրիտանիայում 1958 թվականին իրանցի հոր և բրիտանուհի մոր ընտանիքում, համալսարանն ավարտելուց հետո՝ 1983 թվականին, միացել է CNN-ին։ Նա լայն ճանաչում է ձեռք բերել 1990–1991 թվականներին Պարսից ծոցի պատերազմի լուսաբանման շնորհիվ։ Ավելի ուշ նա ռեպորտաժներ է պատրաստել Բոսնիա և Հերցեգովինայից՝ քաղաքացիական պատերազմի ժամանակ, որտեղ, ի թիվս այլոց, հարցազրույց էր վերցրել գեներալ Ռատկո Մլադիչից։ 2009 թվականից նա վարում է «Ամանպուր» ամենօրյա երեկոյան հաղորդումը (բացառությամբ 2010–2012 թվականների ընդմիջման, երբ աշխատել է «ABC News»-ում)։ Ամանպուրը հարցազրույցներ է վարել բազմաթիվ ազդեցիկ քաղաքական գործիչների հետ։