ԱՄՆ-ն Իրանում փրկարարական գործողության ժամանակ ոչնչացրել է իր երկու տրանսպորտային ինքնաթիռները՝ կանխելու համար, որ դրանք չգրավվեն իրանական ուժերի կողմից, հաղորդել է «CBS News»-ը՝ հղում անելով ամերիկացի պաշտոնյաների:

Ամերիկյան հատուկ նշանակության ուժերը փրկել են Իրանում խոցված F-15 կործանիչի անձնակազմի երկրորդ անդամին։

Գործողությանը մասնակցող հատուկ նշանակության ուժերը մեկնել են նրանց դուրս բերելու համար ուղարկված երեք լրացուցիչ ինքնաթիռներով: Նրանք և փրկված օդաչուները տեղափոխվել են Քուվեյթ: Գործողությունն ավարտվել է կեսգիշերից կարճ ժամանակ առաջ, և բոլոր ամերիկյան ուժերը լքել են Իրանի օդային տարածքը։

«CBS News»-ի տվյալներով՝ ուրբաթ օրը առաջին փրկված օդաչուին տեղափոխող ամերիկյան ուղղաթիռը կրակի տակ է ընկել, որի հետևանքով վիրավորվել են անձնակազմի անդամները, բայց բոլորն անվտանգ վայրէջք են կատարել: Բացի այդ, նույն օրը որոնողական գործողության ժամանակ «A-10 Thunderbolt II» հարձակողական ինքնաթիռը հրդեհվել է և վնասվել: Աղբյուրները հայտնել են, որ օդաչուն կատապուլտվել է Պարսից ծոցի վրայով և հաջողությամբ փրկվել է: