РусскийՏարիներ առաջ Հայաստանում ծնեբեկը շատերի համար գրեթե անհայտ մշակաբույս էր․ այն հազվադեպ էր հանդիպում թե՛ շուկաներում, թե՛ խոհանոցներում։ Սակայն այսօր պատկերն ամբողջությամբ փոխվել է։ Ծնեբեկը ոչ միայն լայն տարածում է գտել, այլ դարձել է խոհարարների, առողջ սնունդ նախընտրողների և համեղ ուտել սիրողների առօրյայի անբաժան մասը։
Այս փոփոխության ճանապարհին իր զգալի ներդրումն ունի «Ծնեբեկ» արտադրողների միության նախագահ Դավիթ Դավթյանը, ով տարիների ընթացքում կարողացել է համախմբել ոլորտի ներկայացուցիչներին, խթանել արտադրությունը և նպաստել ծնեբեկի մշակույթի զարգացմանը Հայաստանում։
Այսօր տեղի ունեցավ «Ծնեբեկ» արտադրողների միության՝ գյուղատնտեսության զարգացման հասարակական կազմակերպության բացման հանդիսավոր արարողությունը։ Միջոցառմանը ներկա էին ոլորտի ներկայացուցիչներ, գյուղատնտեսներ, գործընկեր կազմակերպությունների անդամներ և հյուրեր։
Բացման խոսքով հանդես գալով՝ Դավիթ Դավթյանը նշեց, որ ամեն անգամ նոր շուկա բարձրանալիս ակնհայտ է դառնում արտադրանքի պակասը։ Նրա խոսքով՝ հենց այդ հանգամանքն էլ հիմք է դարձել սկսել ավելի մասշտաբային և հանրայնացված աշխատանք։
Նրա գործընկեր Արամ Վերդյանը, ով Արցախից բռնի տեղահանվելուց հետո նույն ոլորտում իր գործունեությունը շարունակում է Հայաստանում, ընդգծեց, որ հատկապես կարևոր է, երբ «Ծնեբեկ» արտադրողների միությունը կարողանում է համախմբել բոլոր ուժերը։
Միջոցառմանը ներկա էր նաև ՀՀ էկոնոմիկայի նախարարի տեղակալ Արման Խոջոյանը, ով նշեց, որ ասոցիացիայի ստեղծումը համագործակցության արդյունք է։
Դավիթ Դավթյանը MediaHub-ի հետ զրույցում նշեց նաև, որ գյուղատնտեսության չզարգացման հիմնական խնդիրներից մեկը հողակտորների մասնատվածությունն է։ Նրա խոսքով՝ միության կողմից գեներացվել է գաղափար, որի արդյունքում ՄԱԿ-ի կանանց տնտեսական զարգացման ծրագրի շրջանակներում գործընթացում ներգրավվել են նաև կանայք։
Ծրագրի շահառու Գայանե Ծատուրյանը պատմեց, որ ստացել է հազար սածիլ և որոշել են նաև սեփական ներդրում կատարել՝ ձեռք բերելով ևս հազար սածիլ՝ ծրագրի արդյունքների հետ մեծ հույսեր կապելով։
Այս տեմպը պահպանելու դեպքում ծնեբեկը տարիներ անց կդառնա հայկական խոհանոցի անբաժան մասնիկներից մեկը։