Русский
Միացյալ Նահանգների կողմից հերթական հարձակման դեպքում Իրանի պատասխանն ավելի մեծ մասշտաբներ կունենա․ այս մասին ասել է Իրանի գերագույն առաջնորդ այաթոլլա Մոջթաբա Խամենեին «Ընդդեմ գլոբալ ամբարտավանության պայքարի ազգային օրվան» նվիրված հայտարարության մեջ։
Նոյեմբերի 4-ին Իրանում նշվող «Ընդդեմ գլոբալ ամբարտավանության պայքարի ազգային օրվա» կապակցությամբ իր ուղերձում Խամենեին նշել է, որ Պարսից ծոցում, մասնավորապես՝ Հորմուզի նեղուցում տեղի ունեցած իրադարձությունները փշրել են ԱՄՆ-ի անպարտելիության մասին առասպելը և ի ցույց դրել այն պետությունների խոցելիությունը, որոնք ապավինում են օտար տերություններին։
Ըստ Խամենեիի՝ Հորմուզի նեղուցի նկատմամբ Իրանի վերահսկողության հաստատումը և տարածաշրջանում ամերիկյան ռազմակայանների ոչնչացումը ծառայել են որպես պատասխան ամերիկյան ագրեսիային։
Անդրադառնալով ԱՄՆ-ում անցկացված միջանկյալ ընտրությունների արդյունքներին՝ Իրանի առաջնորդը նշել է, որ խորապես սխալվում են նրանք, ովքեր դեռ հույս ունեն, թե ԱՄՆ-ում իշխող կուսակցության փոփոխությունը կփոխի երկրի վարքագիծը, կամ հավատում են, թե զիջումների գնալը կարող է համոզել ԱՄՆ-ին հրաժարվել թշնամանքից։
Իրանի առաջնորդը կոչ է արել շարունակել ազգի հզորացմանն ուղղված ռազմավարությունը՝ ընդգծելով, որ սոցիալական միասնությունը բացարձակ զսպման հասնելու գլխավոր նախապայմանն է։
Նա շեշտել է, որ ԱՄՆ-ի ռազմական և միջազգային կարողությունն անշրջելի անկման փուլում է, իսկ ամերիկյան հեգեմոնիայի քայքայումն արագանում է։