Русский
Ցուրտ եղանակին մաշկը խոնավեցման և պաշտպանության կարիք ունի, սակայն խորհուրդ չի տրվում մեծ քանակությամբ քսուք քսել սառնամանիքին դուրս գալուց անմիջապես առաջ։
Կոսմետոլոգ Իննա Կրավեցը «Գազետա»-ին բացատրել է, թե ինչու է դա կարող անհարմարություն առաջացնել, և ինչպես ճիշտ օգտագործել մաշկի խնամքի միջոցները ցուրտ եղանակին։
«Ցրտին դուրս գալուց առաջ քսուք չօգտագործելու խորհուրդը չպետք է ընկալել որպես կատարելապես արգելված գործողություն։ Ձմռանը խոնավեցնող և պաշտպանիչ միջոցներն իրականում օգնում են պահպանել մաշկի պաշտպանիչ շերտը։ Խնդիրն առաջանում է այն դեպքում, երբ դուրս գալուց անմիջապես առաջ չափազանց շատ քսուք եք քսում՝ առանց ժամանակ տալու, որ այն տարածվի և մասամբ ներծծվի»,- պարզաբանել է մասնագետը։
Նրա խոսքով՝ տարածված այն պնդումը, թե քսուքի բաղադրության մեջ առկա ջուրը կարող է սառչել ծակոտիներում և վնասել մաշկը, սխալ է։ Մաշկի ջերմաստիճանը մնում է ավելի բարձր, քան շրջակա օդինը, ուստի կոսմետիկ միջոցի մեջ պարունակվող ջուրը դեմքի վրա սառույցի չի վերածվում։
Այնուամենայնիվ, քսելուց հետո մաշկի մակերեսին որոշ ժամանակ կարող է մնալ խոնավ շերտ։ Ցուրտ և քամոտ եղանակին այդ խոնավության գոլորշիացումն ուժեղացնում է ցրտի զգացողությունը, և միջոցը, որը դեռ լիովին չի չորացել, կարող է անհարմարություն պատճառել։
«Լավագույն տարբերակն է քսուքը քսել դուրս գալուց մոտ 20–30 րոպե առաջ։ Այդ ընթացքում միջոցը հասցնում է հավասարաչափ տարածվել, և մաշկի վրա նկատելի խոնավ շերտ չի մնում։ Եթե շտապում եք, ապա քսեք բարակ շերտով, իսկ ավելցուկը զգուշորեն հեռացրեք անձեռոցիկով»,- խորհուրդ է տվել Կրավեցը։
Ցուրտ եղանակին քսուքները (կրեմները) հաճախ ավելի նախընտրելի են, քան թեթև գելերը կամ հեղուկ լոսյոնները։ Դրանց ավելի խիտ կառուցվածքն օգնում է նվազագույնի հասցնել խոնավության կորուստը և պաշտպանում է մաշկը չոր օդից ու քամուց։
Հատկապես օգտակար են այն միջոցները, որոնք պարունակում են կերամիդներ, սկվալան, գլիցերին և այլ բաղադրիչներ, որոնք ամրապնդում են մաշկի պաշտպանիչ շերտը։ Այնուամենայնիվ, յուղոտ կամ պզուկների հակում ունեցող մաշկի դեպքում պետք է ընտրել այնպիսի միջոցներ, որոնք չեն առաջացնում ծակոտիների խցանում (ոչ կոմեդոգեն են)։
Խուսափեք օգտագործել այնպիսի միջոցներ, որոնք արդեն իսկ առաջացնում են այրոց, կարմրություն կամ թեփոտում, հատկապես նախքան ցրտին դուրս գալը։ Թթուները, ռետինոիդները և սպիրտ պարունակող միջոցները կարող են մեծացնել արդեն իսկ վնասված կամ զգայուն մաշկի զգայունությունը։
«Եթե երեկոյան խնամքից հետո դեմքի մաշկը զգալիորեն գրգռված է, ապա առավոտյան ավելի լավ է օգտագործել մեղմ, վերականգնող քսուք՝ առանց որևէ այլ ակտիվ բաղադրիչ ավելացնելու», — խորհուրդ է տվել կոսմետոլոգը։
Մեկ այլ տարածված սխալ է դրսում հայտնվելը դեմքը լվանալուց անմիջապես հետո, երբ մաշկը դեռ խոնավ է։ Տնից դուրս գալուց առաջ սրբիչով թեթևակի չորացրեք դեմքը և սպասեք, մինչև այն լիովին չորանա։ Նույնը վերաբերում է ձեռքերին. լվանալուց հետո մանրակրկիտ չորացրեք դրանք, քսեք ձեռքի կրեմ և հագեք ձեռնոցներ։