Русский
Սիրիայի Հալեպ քաղաքում իրավիճակը շարունակում է լարված մնալ։
Ինչպես ավելի վաղ հայտնել էինք, քրդերի գլխավորած «Սիրիայի դեմոկրատական ուժերի» (ՍԴՈւ) կողմից քաղաքի բնակելի թաղամասերի և տարբեր տարածքների վրա հարձակումներ էին եղել, որոնք հանգեցրել էին քաղաքացիական բնակչության շրջանում զոհերի և լայնածավալ նյութական վնասների։
Չորս օր առաջ սիրիական բանակը հայտարարել էր Հալեպի Շեյխ Մաքսուդ թաղամասում բոլոր ռազմական գործողությունների դադարեցման մասին։
Սակայն, MediaHub-ին ահազանգում են Հալեպի հայ համայնքի ներկայացուցիչները, որ կրակոցները չեն դադարել։
«Կրակոցները չեն դադարում, բայց առաջվա պես ինտենսիվ չեն, 2026-ը սկսվեց բախումներով Մերձավոր Արևելքում, Իրանում ու Սիրիայում իրավիճակը հանգիստ չէ, կիզակետում շարունակում է մնալ Հալեպը, ներքին բախումները հրահրում են քրդերը, որոնք ֆինանսավորվում են դրսից»,- MediaHub-ի հետ զրույցում նշեց Հալեպի հայ համայնքի ներկայացուցիչ Գևորգ Ճոսլակեանը:
Ըստ MediaHub-ի զրուցակցի՝ այս պահին Հալեպի հայկական թաղամասում վտանգ չկա, մարդիկ դուրս են եկել ապաստարաններից, խանութներն արդեն բաց են, հայերին, բարեբախտաբար, միայն նյութական վնասներ է պատճառվել։
«Այժմ ամենը հսկվում է, սակայն, կրակոցներ մեկ է լսվում են քաղաքի արվարձաններում, տարբեր հատվածներում։ Այս ընթացքում արտագաղթ եղավ, այս պահին մենք որոշել ենք վաճառել մեր ունեցվածքը և տեղափոխվել Հայաստան։ Մեր ընկերներից՝ հայերն արդեն իսկ շատերը տեղափոխվել են Հայաստան, Հալեպն այլևս ապահով չէ մեզ համար»,- ասաց Ճոսլակեանը։
Մարիաննա Արամյան