Վաշինգտոնում Դանիայի և Գրենլանդիայի դեսպանները սկսել են եռանդուն ջանքեր՝ կոչ անելու ԱՄՆ օրենսդիրներին, ինչպես նաև Թրամփի վարչակազմի կարևոր պաշտոնյաներին հետ կանգնել նախագահ Դոնալդ Թրամփի՝ ռազմավարական նշանակություն ունեցող Արկտիկական կղզու գրավման կոչից, գրել է AP-ն։

Դանիայի դեսպան Յեսպեր Մյոլլեր Սյորենսենը և Վաշինգտոնում Գրենլանդիայի գլխավոր ներկայացուցիչ Ջեյքոբ Իսբոսեթսենը հինգշաբթի օրը հանդիպել են Սպիտակ տան Ազգային անվտանգության խորհրդի պաշտոնյաների հետ՝ քննարկելու Թրամփի կողմից Գրենլանդիան ձեռք բերելու ջանքերը, հնարավոր է՝ ռազմական ուժով, ասել են Դանիայի կառավարության պաշտոնյաներ, որոնք խոսել են անանունության պայմանով։

Սպիտակ տունը չի արձագանքել հանդիպման վերաբերյալ մեկնաբանության դիմումին։

Այս շաբաթ դեսպանները նաև մի շարք հանդիպումներ են ունեցել ամերիկացի օրենսդիրների հետ՝ փորձելով համոզել Թրամփին հետ կանգնել իր սպառնալիքից։

Պետքարտուղար Մարկո Ռուբիոն, ինչպես սպասվում է, հաջորդ շաբաթ կհանդիպի դանիացի պաշտոնյաների հետ։

Հինգշաբթի օրը «New York Times»-ին տված հարցազրույցում Թրամփը նշել էր, որ ինքը պետք է տիրապետի ամբողջ Գրենլանդիային, այլ ոչ թե պարզապես օգտվի երկարատև պայմանագրից, որը Միացյալ Նահանգներին լայն լիազորություններ է տալիս Գրենլանդիան օգտագործել ռազմական դիրքերի համար։