ԱՄՆ պաշտոնյաները առաջարկել են ընդլայնել «Խաղաղության խորհրդի» մանդատը Գազայի հատվածի համար՝ ներառելով այլ թեժ կետեր, ինչպիսիք են Ուկրաինան և Վենեսուելան, «The Financial Times»-ին հայտնել են թեմային ծանոթ աղբյուրները։

Աղբյուրներից մեկը կարծիք է հայտնել, որ Թրամփի վարչակազմը «Խաղաղության խորհուրդը» դիտարկում է որպես «ՄԱԿ-ի պոտենցիալ փոխարինող» և «մի տեսակ ոչ պաշտոնական զուգահեռ մարմին՝ Գազայից բացի այլ հակամարտությունները լուծելու համար»։

ԱՄՆ պաշտոնյան նշել է, որ «Խաղաղության խորհրդի» աշխատանքը ներկայումս կենտրոնացած է Գազայի հակամարտության վրա և դրանից այն կողմ չի տարածվում։

Արևմտյան և արաբ դիվանագետները մտահոգություն են հայտնել այս նոր մարմնին Մերձավոր Արևելքից շատ ավելի հեռու միջնորդելու ընդլայնված լիազորություններ տրամադրելու առաջարկի վերաբերյալ։ «Տարածաշրջանում այս գաղափարի հետ կապված մեծ զգուշություն կա... սա նորմալ ընթացակարգ չէ», - ասել է արաբ դիվանագետը՝ հավելելով, որ թեման քննարկվել է տարածաշրջանային պաշտոնյաների շրջանում։

Դիվանագետների խոսքով՝ ամերիկացի պաշտոնյաները Վենեսուելան որպես Խորհրդի կողմից ապագա միջնորդության հնարավոր տարածք են առաջարկել երկրի նախագահ Նիկոլաս Մադուրոյի առևանգումից հետո։

«Ներկայումս առաջարկվում է ստեղծել այս հատուկ խորհուրդը հատուկ ուկրաինա-ռուսական գործի համար», - ասել է մեկ այլ պաշտոնյա։ Նա նշել է, որ այս խորհուրդը, որը ներառում է Ուկրաինայի, Եվրոպայի, ՆԱՏՕ-ի և Ռուսաստանի ներկայացուցիչներ, կհետևի և կապահովի 20 կետանոց խաղաղության առաջարկի իրականացումը։

Թրամփն ավելի վաղ հայտարարել էր Գազայի խաղաղության խորհրդի ստեղծման մասին։ Դրա ստեղծումը խաղաղության ծրագրի մի մասն է՝ միջազգային ուժերի տեղակայման հետ մեկտեղ։ Հաջորդ օրը Սպիտակ տունը հրապարակել էր խորհրդի կազմը։ Այն ներառում է նաև ԱՄՆ պետքարտուղար Մարկո Ռուբիոյին, ԱՄՆ նախագահի հատուկ դեսպանորդ Սթիվ Վիտկոֆֆին և Թրամփի գործարար փեսային՝ Ջարեդ Քուշներին։