Այս տարվա ձյան առատ տեղումներից հետո ձնամաքրման աշխատանքների, ինչպես նաև ճանապարհների սառած հատվածներին արված աղ ու ավազի հետևանքով մայրաքաղաքում փոսերի թիվը մի քանի անգամ աճել է, ինչն էլ հանգեցրել է տասնյակ վարորդների դժգոգություններին. փոսերի հետևանքով վնասվում են մեքենանները, բայց ոչ ոք պատասխանատվություն չի կրում։ 

Ի վերջո ե՞րբ են լցվելու այդ փոսերը, ե՞րբ են վարորդները կարողանալու ազատ շունչ քաշել և վարելու ընթացքում փոսն ընկնելու մտքից ավելորդ չլարվել. MediaHub-ը փորձեց պարզել Երևանի քաղաքապետարանից։

Երևանի քաղաքապետարանից մեզ հայտնեցին, որ անցած շաբաթվա դրությամբ փոսանորոգման աշխատանքներ են իրականացվում Երևանի 12 վարչական շրջանի մայրաքաղաքային նշանակության փողոցներում:

«Աշխատանքների տեխնիկական վերահսկողությունն իրականացնում է մրցույթում հաղթած լիցենզավորված ընկերությունը, նաև լրացուցիչ հսկողություն են իրականացնում վարչության պատասխանատու ինժեներները»,- նշեցին գերատեսչությունից:
   
Ըստ մեզ փոխանցված տվյալների՝ ընթացիկ տարում ճանապարհների փոսալցման աշխատանքների համար համայնքային բյուջեով կհատկացվի 1.100.000.000 դրամ:

Էմմա Մարտիրոսյան