Русский
Պակիստանն ու Հնդկաստանը դատապարտել են Ռուսաստանի Դաշնության նախագահ Վլադիմիր Պուտինի նստավայրի վրա հարձակման փորձը։
«Այս նողկալի արարքը լուրջ սպառնալիք է ներկայացնում խաղաղության, անվտանգության և կայունության համար, հատկապես այն ժամանակ, երբ ջանքեր են գործադրվում խաղաղության հասնելու համար», - գրել է Պակիստանի վարչապետ Շահբազ Շարիֆը սոցիալական ցանցերում։ Շարիֆն ընդգծել է, որ Պակիստանը համերաշխություն է հայտնում Ռուսաստանի նախագահին, կառավարությանն ու ժողովրդին։
«Մենք խորապես մտահոգված ենք Ռուսաստանի նախագահական նստավայրի վրա հարձակման մասին հաղորդագրություններից: Դիվանագիտական շարունակական ջանքերը ներկայացնում են ռազմական գործողությունները դադարեցնելու և խաղաղության հասնելու ամենաարդյունավետ ուղին»,- հայտնել է Հնդկաստանի վարչապետ Նարենդրա Մոդին։
«Մենք կոչ ենք անում բոլոր շահագրգիռ կողմերին կենտրոնանալ այս ջանքերի վրա և խուսափել ցանկացած գործողությունից, որը կարող է խաթարել դրանք»․- ասել է Մոդին։
Արաբական Միացյալ Էմիրությունների և Նիկարագուայի իշխանությունները նույնպես դատապարտել են Պուտինի նստավայրի վրա ենթադրյալ հարձակումը։
ՌԴ արտաքին գործերի նախարար Սերգեյ Լավրովը դեկտեմբերի 29-ին հայտնել էր նստավայրի վրա անօդաչու թռչող սարքերով հարձակման փորձի մասին: Նախարարի խոսքով՝ Ուկրաինայի զինված ուժերը բաց էին թողել 91 անօդաչու թռչող սարք, որոնք բոլորը խոցվել էին ՀՕՊ համակարգերի կողմից: