ԱՄՆ պետքարտուղար և նախագահի ազգային անվտանգության հարցերով օգնական Մարկո Ռուբիոն և Արաբական Միացյալ Էմիրությունների նախագահի ազգային անվտանգության հարցերով խորհրդական շեյխ Թահնուն բին Զայեդ Ալ Նահյանը հեռախոսազրույցում քննարկել են Իրանի շուրջ ստեղծված իրավիճակը և Հորմուզի նեղուցում նավագնացությունը, հայտնել է Պետդեպարտամենտի խոսնակ Թոմի Պիգոտը։

Պիգոտի խոսքով՝ Ռուբիոն և Ալ Նահյանը «քննարկել են տարածաշրջանային անվտանգության մի շարք հարցեր, այդ թվում՝ Լիբանանում ստեղծված իրավիճակը, ինչպես նաև ԱՄՆ-ի և ԱՄԷ-ի միջև շարունակական համակարգումը՝ Իրանին և նրա տարածաշրջանային միջնորդներին պատասխանատվության ենթարկելու համար»։ «Պետքարտուղար Ռուբիոն ընդգծել է Հորմուզի նեղուցով նավարկության ազատության կարևորությունը», - նշել է դիվանագետը։

Օգոստոսի 17-ին Reuters-ը հայտնել էր, որ Հորմուզի նեղուցով նավագնացությունը հանգստյան օրերին նվազագույնի է հասցվել՝ Աբու Դաբիի ազգային նավթային ընկերության (ADNOC) երեք նավերի վրա հարձակումների մասին հաղորդագրություններից հետո։ Օգոստոսի 13-14-ին ADNOC-ը հայտնել է, որ իր երեք նավերը հարձակման են ենթարկվել նեղուցով անցնելիս։