Русский
Ռուսաստանում Իրանի դեսպան Քազեմ Ջալալին հայտնել է Թեհրանի պաշտոնական դիրքորոշումը ներկայիս ռազմական հակամարտության դադարեցման վերաբերյալ:
«Russia Today»-ին տված հարցազրույցում դիվանագետն ընդգծել է, որ Իրանը չի ձգտում սրացման և միշտ պատրաստ է երկխոսության, սակայն բանակցությունները հնարավոր են միայն մի շարք հիմնարար պահանջների բավարարման դեպքում։
Իրանի հինգ հիմնական պահանջներն են՝
- Կայուն խաղաղության հասնելը. Թեհրանը հայտարարում է, որ պարզ հրադադարը բավարար չէ։ Իրանը կարծում է, որ ժամանակավոր դադարը հակառակորդները կօգտագործեն վերախմբավորվելու և նոր հարձակման նախապատրաստվելու համար։ Նպատակը պետք է լինի տարածաշրջանում երկարատև խաղաղությունը։
- Ագրեսորի պատժումը. Իրանը պնդում է ագրեսորի պաշտոնապես նույնականացման և պատասխանատվության ենթարկելու վրա։
- Փոխհատուցման վճարումը. Թեհրանը պահանջում է նյութական վնասի և ռազմական կորուստների լրիվ փոխհատուցում։ Դեսպանը նաև նշել է, որ անդառնալի կորուստները, ինչպիսին է երկրի առաջնորդի մահը, անգին են, բայց տնտեսական վնասը պետք է փոխհատուցվի։
- Պատժամիջոցների վերացում. Խաղաղ կարգավորման պարտադիր դրույթներից մեկը պետք է լինի Իրանի դեմ սահմանված միջազգային պատժամիջոցների լիակատար վերացումը։
- Միջուկային իրավունքների ճանաչում. Միջազգային հանրությունը պետք է պաշտոնապես ճանաչի Իրանի՝ միջուկային տեխնոլոգիաներ զարգացնելու իրավունքը։
«Եթե որևէ օր տեսնենք, որ այս պայմանները բավարարված են, և բանակցությունները հնարավոր են, մենք անպայման կսկսենք դրանք, քանի որ Իրանը պատերազմի չի ձգտում», - ընդգծել է Ջալալին։