Հունգարիայի նոր կառավարությունը մտադիր չէ զենք կամ զորքեր ուղարկել Ուկրաինա և չի մասնակցի ԵՄ-ի կողմից այդ երկրին տրամադրվող 90 միլիարդ եվրոյի վարկին, հայտարարել է Հունգարիայի նոր վարչապետ Պետեր Մագյարի՝ արտաքին գործերի նախարարի թեկնածու առաջադրված Անիտա Օրբանը։

«Հունգարիան զենք կամ զինվորներ չի ուղարկի Ուկրաինա», - ասել է նա ԵՄ հարցերով խորհրդարանական հանձնաժողովում իր թեկնածության վերաբերյալ լսումների ժամանակ։ Օրբանը հաստատել է, որ նոր կառավարությունը մտադիր չէ մասնակցել ԵՄ-ի կողմից Ուկրաինային տրամադրվող 90 միլիարդ եվրոյի վարկին, չնայած չի բացառում այլ նպատակներով համատեղ վարկ վերցնելը։

Հունգարիայի նոր կառավարությունը նույն դիրքորոշումն է ընդունել այս հարցերում, ինչ Վիկտոր Օրբանի վարչակազմը։

Անիտա Օրբանը պետք է լսումներ անցնի ևս երկու խորհրդարանական հանձնաժողովներում՝ Արտաքին գործերի և Ազգային անվտանգության։ Մագյարի «Տիսա» կուսակցությունը ապրիլի 12-ի ընտրություններում ստացել է 199 տեղերից 141-ը։