Եվրոպական Միությունը պատրաստում է արտակարգ միջոցառումներ՝ Հայաստանի համար առևտրային սահմանափակումները մեղմելու և Ռուսաստանից ներմուծման սահմանափակումները փոխհատուցելու նպատակով, հաղորդել է «Financial Times»-ը՝ հղում անելով Եվրահանձնաժողովի ծրագրերին ծանոթ չորս աղբյուրների։

Միջոցառումները ներառում են Հայաստանից ներմուծվող սննդամթերքի և գյուղատնտեսական արտադրանքի մաքսատուրքերի նվազեցում։ Դրանք կազդեն Ռուսաստանի արգելքների ներքո մոտ 20 կատեգորիայի ապրանքների մեծ մասի վրա։

«Ժամանակն է, որ մենք առաջ շարժվենք և աջակցենք նրանց, ցույց տանք, որ կարող ենք լինել հուսալի գործընկեր», - հրատարակությանը ասել է աղբյուրներից մեկը։ «Նրանց անհրաժեշտ են ընկերներ <...>, և մենք պետք է պաշտպանենք մեր հարևանությունը»։

FT-ի երկու աղբյուրներ նշել են, որ Բրյուսելը մտահոգված է, որ Մոսկվան կարող է մեծացնել առևտրային ճնշումը Հայաստանի վրա։

Հայաստանի համար աջակցության միջոցառումների առաջարկները կարող են ներկայացվել մի քանի շաբաթվա ընթացքում։ «Հանձնաժողովը կառաջարկի առևտրային միջոցառումներ՝ օգնելու ավելի շատ հայկական բիզնեսների մուտք գործել ԵՄ-ի նոր շուկայական հնարավորություններ և աջակցելու երկրի տնտեսությանը, որտեղ այն ամենաշատն է տուժել», - ասել է Եվրահանձնաժողովի խոսնակի տեղակալ Օլոֆ Գիլը։

Ռուսաստանը սկսեց սահմանափակումներ կիրառել հայկական մրգերի, բանջարեղենի, ծաղիկների, ձկան, ալկոհոլի, հանքային ջրի և այլ ապրանքների ներմուծման վրա խորհրդարանական ընտրություններից առաջ և Երևանի կողմից Բրյուսելին մերձենալու ծրագրերի մասին հայտարարությունից հետո: Ռուսաստանը արգելել է Հայաստանից «կարանտինային արտադրության» ներմուծումը, որը ներառում է մոտ 130 ապրանք, այդ թվում՝ գրեթե բոլոր գյուղատնտեսական ապրանքները, ալյուրը, բույսերը, փայտանյութը, անասնապահական կերերն ու տեքստիլ հումքը: