Մեքսիկայի կառավարությունը երկու ռազմածովային նավերով սնունդ և անհրաժեշտ ապրանքներ է ուղարկել Կուբա, հայտարարել է լատինաամերիկյան երկրի արտաքին գործերի նախարարությունը։

«Մարդասիրական օգնություն է ուղարկվում Կուբայի Հանրապետություն «Papaloapan» և «Isla Holbox» լոգիստիկ նավերով, որոնք տեղափոխում են ավելի քան 814 տոննա սնունդ կղզու քաղաքացիական բնակչության համար», - ասվում է Արտաքին գործերի նախարարության հայտարարության մեջ։

Երկու նավերն էլ փետրվարի 8-ին մեկնել են Վերակրուսի նավահանգստից։ «Papaloapan»-ը տեղափոխել է մոտ 536 տոննա սնունդ և անհրաժեշտ ապրանքներ, այդ թվում՝ հեղուկ կաթ, մսամթերք, բրինձ, լոբի, թխվածքաբլիթներ, պահածոյացված թյունոս և սարդինա, բուսական յուղ և անձնական հիգիենայի պարագաներ։

«Isla Holbox»-ը տեղափոխել է ավելի քան 277 տոննա կաթի փոշի, որը նախատեսված է մարդասիրական կարիքների համար։ Ճանապարհորդությունը, ինչպես սպասվում է, կտևի մոտ չորս օր։

Մեքսիկայի կառավարությունը հայտարարել է, որ Կուբա առաքման համար պատրաստվում են լրացուցիչ օգնության բեռներ՝ ավելի քան 1500 տոննա կաթի փոշի և լոբի։ Կուբային օգնությունը տրամադրվում է Մեքսիկայի նախագահ Կլաուդիա Շեյնբաումի ցուցումով և արտացոլում է «մեքսիկացի ժողովրդի մարդասիրական սկզբունքներն ու համերաշխության ավանդույթը»։

Հունվարի 29-ին ԱՄՆ նախագահ Դոնալդ Թրամփը ստորագրել էր գործադիր հրամանագիր, որով լիազորել էր ներմուծման մաքսատուրքեր սահմանել Կուբա նավթ վաճառող կամ մատակարարող երկրներից ապրանքների վրա։ Նա նաև հայտարարել էր արտակարգ դրություն՝ հղում անելով Հավանայից ենթադրաբար բխող ազգային անվտանգության սպառնալիքին։