Այսօր Բաքվի դատարանը ցմահ ազատազրկման դատապարտեց Արցախի նախկին նախագահ Արայիկ Հարությունյանին, Արցախի ԱԺ  նախագահ Դավիթ Իշխանյանին, ՊԲ նախկին հրամանատար Լևոն Մնացականյանին, Արցախի ԱԳ նախարար Դավիթ Բաբայանին և գեներալ-մայոր Դավիթ Մանուկյանին:

Դատավճիռը հրապարակվեց անմիջապես այն բանից հետո, երբ երեկ Աբու-Դաբիում Հայաստանի և Ադրբեջանի ղեկավարները մասնակցում էին «Զայեդ» մարդկային եղբայրության մրցանակաբաշխությանը։  Մի հարթակում, որը խորհրդանշում է հաշտեցում, մարդասիրություն և ժողովուրդների միջև վստահություն: Նշված միջոցառմանը երկու ղեկավարները հայտարարեցին, որ տարածաշրջանում վեց ամիս է՝ կայուն խաղաղություն է հաստատվել, և կողմերը թևակոխել են «նոր դարաշրջան»:

Հասարակական-քաղաքական գործիչ Նաիրա Զոհրաբյանի կարծիքով՝ այս ամենի ֆոնին դատապարտելի, ցինիկ և ստորացուցիչ են Բաքվի գործողությունները։

«Մի օր առաջ Ալիևին շնորհում են խաղաղության մրցանակ, իսկ քսանչորս ժամ անց նույն պաշտոնյան հրահանգում է ցմահ ազատազրկել մեր հայրենակիցներին, որոնց մեղքը միայն ինքնորոշման իրավունքի պաշտպանությունն է»,- MediaHub-ի հետ զրույցում նշեց Զոհրաբյանը:

Նրա խոսքով՝ այս դատավճիռները քաղաքական են, այլ ոչ իրավական։ Նա ընդգծում է, որ խնդրի լուծումը կախված է քաղաքական կամքից և միջազգային աջակցության ակտիվ ներգրավվածությունից: 

«Ամերիկայի և Ֆրանսիայի պաշտոնական կոչերը, ինչպես նաև եկեղեցական միջնորդությունները ցույց են տալիս, որ հնարավոր է ազատ արձակել մեր հայրենակիցներին, եթե Հայաստանն ինքն էլ հետևողական լինի»,- հավելեց նա:

Զոհրաբյանը նաև նշեց, որ Հայաստանի իշխանությունը պետք է բանակցությունների օրակարգում առաջնահերթություն տա ռազմագերիներին և Արցախի մշակութային ժառանգության պահպանությանը, ոչ թե տնտեսական հարցերին, կամ արտաքին գործարքներին:

«Միջազգային փորձը ցույց է տալիս, որ նույնիսկ երկարաժամկետ ազատազրկման դատապարտված անձանց կարող են ազատ արձակել՝ քաղաքական կամքի և ճնշման արդյունքում: Այստեղ անհրաժեշտ է հետևողականություն, ոչ թե հուսահատություն»,- եզրափակեց խոսքը Նաիրա Զոհրաբյանը:

Ալիտա Եղիազարյան