Ռումինիայի էներգետիկայի նախարարությունը ճգնաժամային մակարդակի արտակարգ իրավիճակ է հայտարարել աղտոտված ադրբեջանական նավթի մատակարարման պատճառով, հաղորդել է գերատեսչության կայքը։

Խոսքը 92 հազար տոննա ադրբեջանական հում նավթի մատակարարման մասին է, որը աղտոտված է օրգանական քլորիդներով։ Այս մասին երկրի էներգետիկայի նախարարությանը հայտնել է «OMV Petrom» ընկերությունը։

Հուլիսի 16-ից 18-ը ընկերությունը Ջեյհանի (Թուրքիա) նավահանգստում ընդունել է ադրբեջանական հում նավթով բեռնված նավ։ Պարզվել է, որ խմբաքանակը աղտոտված է։ Petrom-ը որոշել է հրաժարվել 92 հազար տոննա ևս մեկ խմբաքանակ բեռնելուց։

«Այսպիսով, ներմուծված 184 հազար տոննա հում նավթը անհասանելի է դարձել Petrobrazi-ի վերամշակման գործարան մատակարարելու համար», - ասվում է հաղորդագրության մեջ։ Գործարանի անխափան աշխատանքն ապահովելու համար ձեռնարկության սեփականատեր «OMV Petrom»-ը խնդրել է արտակարգ պահուստներից բեռնաթափել 80 հազար տոննա հում նավթ և 30 հազար տոննա դիզելային վառելիք, գրել են ԶԼմ-ները։

Արտակարգ դրության հայտարարումը անհրաժեշտ է եղել վառելիքի պահուստներն օգտագործելու համար։ Էներգետիկայի նախարարությունը տեղեկացրել է Եվրոպական հանձնաժողովին արտակարգ իրավիճակի մասին և թույլատրել է բեռնաթափում արտակարգ պահուստներից, ինչը «ապահովել է վերամշակման գործարանի անխափան գործունեությունը և հնարավորություն է տվել խուսափել ազգային վառելիքի շուկայում լուրջ խափանումներից»։