«Ժողովուրդ» օրաթերթը գրում է.
«Ընդդիմադիր պատգամավորները Նիկոլ Փաշինյանի իշխանությանը մերկացնող ելույթների, կոռուպցիոն բացահայտումների համար հայտնվել են թիրախում:
«Ժողովուրդ» օրաթերթի իրազեկ աղբյուրները փոխանցում են, որ քաղաքական հրահանգով՝ ուժայինները վերից վար փորփրում են 4 կանանց կյանքը:
Խոսքը Աննա Գրիգորյանի, Թագուհի Թովմասյանի, Ագնեսա Խամոյանի եւ Քրիստինե Վարդանյանի մասին է: Ուժային կառույցները քաղաքական հրահանգ են ստացել ակտիվ այս քառյակի նկատմամբ ամեն գնով քրեական վարույթներ հարուցել: Օպերատիվ աշխատակիցները հետեւում են նրանց, փորփրում անցյալը, ընտանիքի անդամներին, բարեկամներին, որ ինչ-որ «թեմաներ գտնեն»:
Իհարկե, նրանցից շատերի բարեկամները, ընտանիքի անդամներն արդեն ազատվել են տարբեր աշխատանքներից, բայց խնդիր է դրված վարկաբեկիչ գործեր հարուցել այս պատգամավորների նկատմամբ:
Անգամ լուսանկարել են պատգամավորներին՝ սրճարանում միասին նստած:
Իրավապահները նաեւ փորձում են գտնել մարդկանց, ովքեր կհամաձայնեն դիմումներ գրել պատգամավորների դեմ: Եվ այդ, բնականաբար կեղծ, սարքովի դիմումների հիման վրա գործեր կհարուցվեն:
«Ժողովուրդ» օրաթերթը գրում է.
«Նիկոլ Փաշինյանի հիստերիկան եւ ոչ ադեկվատ ռեակցիաները աստիճանաբար տարածում են գտնում նրա կառավարման տարբեր օղակներում: «Ժողովուրդ» օրաթերթը արձանագրեց, որ անգամ Հայաստանի ֆուտբոլի ֆեդերացիան է լրագրողական հարցումներին ագրեսիվ արձագանքում:
Նախ հիշեցնենք, որ այս տարվա մայիսի 14-ին «Առաջին հայկական ճակատի» կողմից տեսանյութ տարածվեց, որ «ՀՖՖ-ի պահնորդական ծառայություն մատուցող ՀՖՖ անվտանգության պետը անհամաչափ ուժ եւ բռնություն է կիրառում Հայաստանի Գավաթի խաղարկության եզրափակիչ խաղի ավարտից հետո խաղադաշտում հայտնված անչափահաս երկրպագուի նկատմամբ՝ բռունցքով հարվածելով երեխայի դեմքին: Սա այն դեպքում, երբ երեխան արդեն իսկ «բռնված» էր, եւ դիմադրություն ցույց չէր տալիս։
Այս առիթով «Ժողովուրդ» օրաթերթը հարցում էր ուղարկել ՀՖՖ՝ պարզելու`
1. արդյո՞ք այդ աշխատակիցն ազատվել է աշխատանքից
2. ի՞նչ պայմանագիր է կնքվել ՍՊ ընկերության եւ ՀՖՖ-ի միջեւ ծառայությունների մատուցման համար, եւ որքա՞ն է կազմել մատուցված ծառայությունների արժեքը
3. խնդրում ենք տրամադրել պայմանագրի օրինակը։
Այս պարզ շարադրանքին ՀՖՖ-ն պատասխանել է հիստերիկայով՝ հետ չմնալով Նիկոլ Փաշինյանի կողմից կիրառվող հուզական զեղումներից:
«ՀՖՖ հաստիքացուցակում առկա չէ «անվտանգության պետ», հաստիք/պաշտոն, ուստի նշվածի կապակցությամբ խնդրում ենք այսուհետեւ զերծ մնալ ապատեղեկատվութուն տարածելուց»։
ՀՖՖ-ում լավ չեն հասկացել թերեւս, որ այդ տեղեկությունը վաղուց է տարածվել. տարածել է «Առաջին հայկական ճակատը»: Ընդ որում, ՀՖՖ-ն չի հերքել, որ իրենց անվտանգության հարցերով ծառայություն մատուցողը բռնություն է կիրառել երիտասարդի նկատմամբ: Իսկ «Ժողովուրդ» օրաթերթն ընդամենը հարցմամբ փորձում էր ճշգրտումներ անել թեմայի վերաբերյալ, որի առիթով ստացել է անադեկվատ, հիստերիկ պատասխան:
Ինչ վերաբերում է մյուս հարցերին, ապա ՀՖՖ-ից ընդհանրապես չեն պատասխանել դրանց. սա ոչ այլ ինչ է, քան անպատասխանատու վարքագիծ ՀՀ քաղաքացիների նկատմամբ:
Հիշեցնենք, որ նույն աղբյուրներից ստացած տեղեկության համաձայն՝ երիտասարդին ծեծի ենթարկած Նորայր Ավետիսյանը ՀՖՖ փոխնախագահ Արմեն Նիկողոսյանի ընկերն է, եւ նրա միջոցով ՀՖՖ-ն շուրջ 90 միլիոնի պայմանագիր է կնքել այդ ընկերության հետ, որի մասին ֆեդերացիան «Ժողովուրդ» օրաթերթին կասկածելի կերպով որեւէ տեղեկություն չի տրամադրում: Մինչդեռ «Ժողովուրդ» օրաթերթի իրազեկ աղբյուրները փոխանցում են, որ հսկայական գումարներ են նման եղանակով ծախսվում, որի մասին՝ առաջիկայում»։
«Հրապարակը» գրում է ․
«Հրապարակ»-ի տեղեկություններով՝ Արցախի պաշտպանության նախկին նախարար Սամվել Բաբայանը մայիսի վերջին դիմել է Քննչական կոմիտեի ղեկավար Արթուր Պողոսյանին՝ քրեական վարույթ նախաձեռնելու համար։ Իրավապահ համակարգի մեր աղբյուրները կցկտուր տեղեկություններ ունեին Բաբայանի դիմումի վերաբերյալ, միայն նշեցին, որ այն վերաբերում է որոշ անձանց եւ 98-ի դեկտեմբերի 10-ին 7 կրակոցով սպանված պաշտպանության փոխնախարար Վահրամ Խոռխոռունու գործին։ Քննչական կոմիտեից հաստատեցին հաղորդման վերաբերյալ մեր տեղեկությունը՝ այլ մանրամասներ չներկայացնելով․ «Ստացել ենք հաղորդումը, իրականացնում ենք վարույթային գործողություններ»։
Նշենք, որ ՔԿ-ում այժմ ինտենսիվությամբ քննվում է Բաբայանի ներկայացրած մեկ այլ հաղորդման վրա հարուցված քրեական գործ եւս՝ 2023-ի սեպտեմբերին ադրբեջանական հարձակման ժամանակ պաշտոնեական անփութության ու զենք-զինամթերքը հակառակորդին հանձնելու վերաբերյալ։ Այս գործով հարցաքննվում է ե՛ւ Սամվել Բաբայանը, ե՛ւ Արցախի նախագահ Սամվել Շահրամանյանը։
«Ժողովուրդ» օրաթերթը գրում է.
««Ժողովուրդ» օրաթերթի տեղեկությունների համաձայն՝ ՀՀ նորանշանակ ոստիկանապետ Արամ Ղազարյանը ներքին քննարկում է ունեցել համակարգի ներսում ու մտահոգություն հայտնել հանրապետությունում ամեն օր հնչող կրակոցների ու դեպքերի վերաբերյալ, հրահանգել է գործընթաց սկսել՝ Նիկոլ Փաշինյանի ասած ճռիկ-վռիկների մասով, և ուժեղացնել օպերատիվ աշխատանքը։
«Ժողովուրդ» օրաթերթին հասած լուրերի համաձայն՝ հրահանգի արդյունքում «Մակարով» զենքը կողքներին ամրացրած անձինք են երեկ բաժիններ տարվել։
«Ժողովուրդ» օրաթերթը դիմեց ՆԳՆ լրատվական բաժին, որտեղից ի պատասխան հայտնեցին, որ ամենօրյա աշխատանք է արվում, ակտիվացվել են որոշ գործողություններ»։
«Հրապարակը» գրում է․
Արտաքին գործերի նախարար Արարատ Միրզոյանը երեկ խորհրդարանում բյուջեի կատարողականի քննարկումից հետո դուրս եկավ եւ անմիջապես հայտնվեց լրագրողների օղակում: Բայց երբ լրագրողներն ու օպերատորները դիրքավորված ընդառաջ գնացին նախարարին, որ նիստի ավարտից հետո ճեպազրույց անցկացնեն, նա ուղղակի խուճապի մատնվեց եւ վախվորած սկսեց ետ-ետ քաշվել ու լուրջ տոնով հորդորել, որ իրեն մոտիկ չգնան։ Լրագրողները զարմացած հետաքրքրվեցին` ինչո՞ւ։ «Այդպես եմ ուզում, մոտիկ մի եկեք»։
Ըստ ամենայնի, Արարատ Միրզոյանը չի կարողանում հաղթահարել հոգեբանական վախերը: 2020 թվականի նոյեմբերի 9-ի գիշերը, հիշեցնենք, Փաշինյանի ստորագրած կապիտուլյացիայից վրդովված մարդկանց խումբը խցանման մեջ հանդիպել էր Արարատ Միրզոյանի մեքենային եւ հարձակում գործել նրա վրա, դաժան ծեծի ենթարկել, որի արդյունքում նա վիրահատվեց։ Փաստորեն, 5 տարի է անցել, բայց նախարարը չի հաղթահարել այդ օրվա վախը: Սակայն պարզ չէ, թե լրագրողներից վախեցող ԱԳ նախարարն ինչպես է բանակցություններ վարում, օրինակ, մեր թշնամի պետությունների ղեկավարների հետ։