Պետդեպարտամենտի ժողովրդավարության, մարդու իրավունքների և աշխատանքի բյուրոյի ավագ խորհրդական Սամուել Սամսոնը խորհուրդ է տվել ԱՄՆ Պետդեպարտամենտին աջակցել Ֆրանսիայի «Ազգային ճակատ» կուսակցության առաջնորդ Մարին Լը Պենին:

Սա կարող է խաթարել Վաշինգտոնի հարաբերությունները Փարիզի հետ, հաղորդել է Politico-ն՝ հղում անելով Պետդեպարտամենտի աղբյուրներին:

Սամսոնը առաջարկությունն արել է այս շաբաթ: Սա տեղի է ունեցել անցյալ ամսվա վերջին ֆրանսիական կուսակցության ղեկավարության հետ նրա հանդիպումից հետո: Այս հարցի վերաբերյալ դեռևս վերջնական որոշում չի կայացվել:

Մարտին Փարիզի դատարանը Լը Պենին դատապարտել էր չորս տարվա ազատազրկման խորհրդարանական օգնականների գործով: Դատարանը նաև որոշել էր նրան զրկել ընտրովի պաշտոններ զբաղեցնելու և ընտրություններին մասնակցելու իրավունքից հինգ տարով, և այս միջոցը, ի տարբերություն ազատազրկման, ուժի մեջ է մտել անմիջապես և կարող է չեղյալ հայտարարվել միայն բողոքարկման հաջողության դեպքում։

Դատավճիռը նրան զրկել էր 2027 թվականին Ֆրանսիայի նախագահի պաշտոնում առաջադրվելու և Ազգային ժողովի (խորհրդարանի ստորին պալատի) վաղաժամկետ լուծարման դեպքում խորհրդարանական ընտրություններին մասնակցելու հնարավորությունից: Լը Պենն ինքը դատարանի որոշումը քաղաքական անվանել է և բողոքարկել բարձրագույն դատարան: Ակնկալվում է, որ գործի վերաքննիչ բողոքի քննությունը կարող է ավարտվել 2026 թվականի ամռանը: