ՀՀ գլխավոր դատախազին
ՀՀ հակակոռուպցիոն կոմիտեի նախագահին
ՀՀ մարդու իրավունքների պաշտպանին
24 հուլիս, 2025 թվական

Հայաստանի Հանրապետության առողջապահության նախարարությունը «ՈՒԻԳՄՈՐ ՔԼԻՆԻՔ» ՓԲԸ-ին տրամադրել է բազմաթիվ անժամկետ լիցենզիաներ բժշկական օգնություն և սպասարկում իրականացնելու համար:

Այդ բազմաթիվ լիցենզիաներով թույլատրվել է «ՈՒԻԳՄՈՐ ՔԼԻՆԻՔ» ՓԲԸ-ին իրականացնել բարդ վիրահատություններ: Սակայն, «ՈՒԻԳՄՈՐ ՔԼԻՆԻՔ» ՓԲԸ-ն չի ունեցել այդ բարդ վիրահատությունների իրականացման համար համապատասխան բժշկական անձնակազմ և հետվիրահատական բուժման համար համապատասխան հագեցվածության վերակենդանացման բաժանմունք:
Այս փաստն ամիսներ առաջ դարձել է պացիենտի մահվան պատճառ:

«ՈՒԻԳՄՈՐ ՔԼԻՆԻՔ» ՓԲԸ-ում առանց օրենքով սահմանված պայմանագրային հիմքի գործել է (աշխատել է) վիրաբույժ: Այս անձի (ով կատարել է բարդ վիրահատություն) կողմից վիրաբուժական միջամտության և ոչ պատշաճ հետվիրահատական բուժման հետևանքով պացիենտը մահացել է:
Բարդ վիրահատության հետվիրահատական բուժօգնությունը չի կատարվել օրենքով նախատեսված ընթացակարգերի համաձայն, քանի որ «ՈՒԻԳՄՈՐ ՔԼԻՆԻՔ» ՓԲԸ-ում հետվիրահատական բուժումը չի կազմակերպվել կոմպետենտ բժիշկների կողմից և հիվանդանոցը չի ունեցել համապատասխան վերակենդանացման բաժանմունք:

«ՈՒԻԳՄՈՐ ՔԼԻՆԻՔ» ՓԲԸ-ի տնօրինությունը օրենքի կոպիտ խախտումներով ընդունել է աշխատանքի և թույլ է տվել կատարել բարդ վիրահատություններ ու հետվիրահատական բուժում այնպիսի անձանց, ովքեր չեն ունեցել համապատասխան մասնագիտական որակավորումներ:

Հայաստանի Հանրապետության առողջապահության նախարարության աշխատակազմի լիցենզավորման գործակալության պետ Վահե Ալեքսանյանի ստորագրությամբ վերջին շուրջ երկու տարիների ընթացքում «ՈՒԻԳՄՈՐ ՔԼԻՆԻՔ» ՓԲԸ-ին տրամադրվել են բազմաթիվ անժամկետ լիցենզիաներ բարդ վիրահատություններ կատարելու համար: Ամենաթարմը տրվել է` մահ արձանագրելուց հետո մեկ ամիս անց` հինգ տարի ժամկետով:

Այսինքն, «ՈՒԻԳՄՈՐ ՔԼԻՆԻՔ» ՓԲԸ-ն լիցենզիայից զրկվելու օրենքով նախատեսված պահանջի (լիցենզավորման ենթակա գործունեության իրականացման հետևանքով պատճառված ծանր վնասի՝ մահ պատճառելու դեպքով, լիցենզիայի գործողության դադարեցման) փոխարեն կրկին խրախուսվել է:

Խրախուսման հիմքն ակնհայտորեն կոռուպցիան է, որը գործում է համակարգված` պետություն և մասնավոր փոխկապակցված ստվերային հսկայածավալ գումարների շրջանառության սխեմայով (թանկարժեք վիրահատություններ, որոնք կատարվում են կեղծ գովազդի միջոցով և որոնց համար վճարման գումարները չեն մուտքագրվում գանձարան, չեն հարկվում և այլն):

Բժշկական կոռուպցիան Հայաստանի Հանրապետությունում դարձել է առավել վտանգավոր, մարդիկ բուժվելու փոխարեն մահանում են։ Այս կոռուպցիան տեղի է ունենում պետության ներկայացուցիչների կողմից հատկապես մասնավոր բժշկական կենտրոններին անօրինական արտոնություններ շնորհելու միջոցով:

Իմ ձեռքի տակ առկա փաստաթղթերի ուսումնասիրությունը հաստատում է, որ «ՈՒԻԳՄՈՐ ՔԼԻՆԻՔ» ՓԲԸ-ի տնօրինությունը, ՀՀ առողջապահության նախարարությունը և ՀՀ առողջապահական և աշխատանքի տեսչական մարմինը համատեղ իրականացրել են ապօրինի գործողություններ, որպիսիք նախատեսում են քրեական պատիժներ` ՀՀ քրեական օրենսգրքով նախատեսված բազմաթիվ հանցագործությունների համար` գլուխ 25-րդ` կյանքը և առողջությունը վտանգող հանցագործություններ և գլուխ 32-րդ` տնտեսական հանցագործություններ:

Ուստի, հիմք ընդունելով վերոգրյալը և ղեկավարվելով ՀՀ քրեական դատավարության օրենսգրքի համապատասխան դրույթներով պահանջում եմ նախաձեռնել քրեական վարույթ և որոշում կայացնել հանրային քրեական հետապնդում նախաձեռնել առնվազն` «ՈՒԻԳՄՈՐ ՔԼԻՆԻՔ» ՓԲԸ-ի տնօրեն` Զավեն Քոլոյանի և Հայաստանի Հանրապետության առողջապահության նախարարության աշխատակազմի լիցենզավորման գործակալության պետ Վահե Ալեքսանյանի նկատմամբ, և միջոցներ ձեռնարկել դադարեցնել «ՈՒԻԳՄՈՐ ՔԼԻՆԻՔ» ՓԲԸ-ին սույն թվականի մարտի 17-ին տրամադրված` Կ-ԲՕ-000351 (հասցե` Երևան, Պուշկին փողոց 56) լիցենզիայի գործունեությունը:

Քրեական վարույթի ընթացքն ապահովելու համար անհրաժեշտ փաստաթղթերը առկա են ՀՀ առողջապահության նախարարությունում, ՀՀ առողջապահական և աշխատանքի տեսչական մարմնում, ՀՀ պետական եկամուտների կոմիտեում և «ՈՒԻԳՄՈՐ ՔԼԻՆԻՔ» ՓԲԸ-ում:

​ Փաստաբան Զարուհի Փոստանջյան