Այս պահին Հայաստանը կանգնած է բնապահպանական աղետի առջև, արդեն քանի օր է, ինչ ոչնչանում են Տավուշի մարզի անտառները, սակայն Հայաստանի իշխանությունները պահպանում են գրեթե մեռելային լռություն։ Հանրությունը, գտվում է ինֆորմացիոն բլոկադայի մեջ ու ստանում է միայն կցկտուր տեղեկություններ, այն էլ հիմնականում ֆեյսբուքյան օգտատերերի կողմից։ Ուսումնասիրելով Նիկոլ Փաշինյանի էջը՝ ակնհայտ է դառնում, որ այս աղետի ֆոնին նա մազաչափ անգամ չի շեղվում իր կեղծ օրակարգերը գեներացնելու քաղաքականությունից։ Բացի իր ծիծաղ առաջացնող «բարի լույս»-ներից, նա այս ողջ հրդեհի ընթացքում մասնակցել է պատարագների, հրապարակումներ արել իր իսկ կողմից հռչակված «հերոսների» մասին, այցելել մանկապարտեզներ ու լողավազաններ ու վերջ, հա, մեկ էլ ինչ-որ մի կին մոտեցել է իրեն, ու ոչ մի խոսք մոլեգնող հրդհեներից։
Բնականաբար տեղեկատվության բացակայության արդյունքում բացը ակամայից լրացնում է Դիլիջանի ինչ-որ քաղաքապետ, որը հրդեհի ֆոնին տեսախցիկի առջև հայտնվում է ծխախոտով։ Այն, որ նա հրդեհի վայրում ծխախոտով է, խոսում է նրա ինտելեկտի իսպառ բացակայության մասին, սակայն քննարկման թիվ մեկ օրակարգը ոչ թե նա պետք է լիներ, այլ բուն աղետը ու այդ մասին իշխանության գրեթե ամբողջական լռությունը։
Այնինչ այդ լռությունը կարող է պայմանավորված լինել շատ ավելի առարկայական ու շոշափելի պատճառներով, քան թվում է առաջին հայացքից։ Սովորաբար անտառային խոշոր հրդեհները լինում են տարվա ամենաշոգ եղանակներին, երբ ստեղծվում է հրդեհավտանգ իրավիճակ, զբոսաշրջային սեզոններին՝ անփութության արդյունքում, սակայն նոյեմբեր ամսին գոյություն չունի ո՛չ մեկը, ո՛չ էլ մյուսը։ Այնինչ ակնհայտ է նաև, որ տվյալ հրդեհում առկա է մարդկային գործոնը, քանի որ կենդանիները չէին կարող նման աղետի բռնկման պատճառ դառնալ, ոչ էլ կիզիչ արևը, այն պարզ պատճառով, որ այն խոր աշնանը որևէ հրդեհավտանգ իրավիճակ չի ստեղծում։
Ուստի հրդեհի բռնկման ամենահավանական տարբերակը կոռուպցիան է, ավելի ստույգ՝ խոշոր անտառահատումը, իսկ հրդեհը կարող է վերացնել դրա հետքերը։ Այստեղից էլ կարելի է անել երկու եզրահանգում, կա՛մ պատկան մարմինները տեղյակ են եղել այդ ամենից ու լռում են դիտավորյալ, կա՛մ անզոր են կատարել իրենց պարտականությունները։ Երկու դեպքում էլ աղետի չափերը դրանից չեն նվազում ու պատկան մարմիններին չեն ազատում պատասխանատվությունից։ Այլ բացատրություն այս լռությանը չի կարող լինել, հակառակ դեպքում մենք պետական մակարդակով յուրաքանչյուր ժամ կստանայինք տեղեկություններ, հանրության ողջ ուշադրությունը պետության կողմից կսևեռվեր աղետին, ու Նիկոլ Փաշինյանը իր հերթական մանկապարտեզ այցելելու փոխարեն կգնար դեպքի վայր, եթե իհարկե նա կարևորում է պատուհասած աղետը, որովհետև Տավուշ իր այցելությունը իրեն ոչ մի քաղաքական դիվիդենտ չի բերելու, բայց այ մանկապարտեզին կից դահլիճի բացմանն այցելելն ու իր էջում թմբկահարելը տեսականորեն իրեն կարող է ապահովել որոշ ընտրական ձայներով։
Կարեն Կարապետյան