Այնուամենայնիվ, ի՞նչ է իրենից ներկայացնում Նիկոլ Փաշինյանի ու Աննա Հակոբյանի մոգոնած «կրթվելը նորաձև է» տխմարաբանությունը։ Բավական է նայել մեկ-երկու դրվագ ու պատկերն ամբողջովին պարզ կլինի։ Այն ոչ միայն պարզ քարոզարշավ է, այլև սոցիալական տիրույթի համար նախատեսված խաբկանք, որի նպատակն է ստեղծել իմիտացիա, իբր այդ զույգը վայելում է հանրության վստահությունը, իբր մարդիկ տոգորված են ուսման տենչով ու ցանկանում են «կրթվել» հատկապես այն մարդու կողմից, որն ինքը չունի լիարժեք կրթություն։ Սակայն նույնիսկ անզեն աչքով է տեսանելի, որ այդ դահլիճները գրեթե երբեք պատահական մարդկանցով չեն լցվում, ու համարյա բոլորը «կրթվում են» ու ստանում ինստրուկտաժ՝ նախքան բուն «կրթական» ծրագրին անցնելը։
Օրերս նայելով այդ ծրագրի տեսանյութերից մեկը՝ տհաճությամբ արձանագրեցի, որ հավաքվածների նպատակը ոչ թե «կթրվելն է», այլ Նիկոլ Փաշինյանին ուղիղ ու անթաքույց քծնելը, ինչն էլ հետադարձ կապով խրախուսվում է նույն «կրթողի» կողմից։ Օրինակ, երբ «Ազատության» լրագրողը սկսեց հարցեր ուղղել Փաշինյանին, հավաքվածները միանգամից իրար հերթ չտալով փորձում էին խանգարել նրան, ընդհատել, նույնիսկ դահլիճից մեկն արձագանքեց, որ իրենք դրա համար չեն հավաքվել այդտեղ, իսկ Նիկոլ
Փաշինյանն էլ հոտի բարի չոբանի պես փորձում էր հանդարտեցնել նրանց։
Սակայն, խեղկատակությունը հասավ իր կուլմինացիային այն ժամանակ, երբ Նիկոլ Փաշինյանը հայտարարեց, որ ԱԱԾ-ն վարչապետի ենթակայության տակ գործող մարմին է։ Այս հայտարարությանը հաջորդեց «հրաշքը», դահլիճը մի մարդու պես սկսեց ծափ տալ, բոլորը միանգամից մի ակնթարթում «կրթվեցին» ու վերջապես իմացան, թե ում է ենթարկվում ԱԱԾ-ն։
Բհագավատ Գիտայում մի այսպիսի նախադասություն կա. «Ես ծնվեցի տգիտության խավարի մեջ և իմ հոգևոր հայրը գիտության լույսով բացեց իմ աչքերը»։ Նույնը տեղի ունեցավ դահլիճում, նախքան հանդիպման գալը որևէ մեկը տեղյակ չէր, որ ԱԱԾ-ն գործում է վարչապետի ենթակայության տակ, հավանաբար տարիներով այդ հարցը հետաքրքրում էր բոլոր մասնակիցներին ու Նիկոլ Փաշինյանի հայտարարությունը դարձավ իմաստնության այն կենարար հեղուկը, որը անտեղյակության փառը վերցրեց մարդկանց աչքերից։
Հատկանշական էր նաև Նիկոլ Փաշինյանի պահվածքը։ Նա ոչ մի բառով, ոչ մի ժեստով չընդհատեց քծնանքի այդ պոռթկումը, չասեց՝ «ախր հարգելի «կրթվամոլ» հավաքվածներ, իմ ասածի մեջ ոչ մի ծափահարելու բան չկար, դա նույնն է, որ ես ասեմ՝ ԱԱԾ նշանակում է Ազգային անվտանգության ծառայություն ու դուք սկսեք ծափ տալ»։
Իհարկե, քծնանքի այդ շքերթին հետևելը զզվանք է առաջացնում, թեպետ մյուս կողմից, եթե մարդկային մի զանգված հանուն իր կարիերայի ցանկանում է մյուսի առաջ սողալ, դա այդ զանգվածի որոշելիքն է, բայց խնդիրն այն է, որ Նիկոլ Փաշինյանը քծնանքի շքերթը կազմակերպում, ստորաքարշների բանակը ձևավորում է պետբյուջեի հաշվին, այլ խոսքով՝ մսխում է հանրության գումարները, իսկ հանրությունը նրան բյուջեն լափելու ու թալանելու լիազորություն չի տվել, ինչն արդեն քրեորեն հետապնդելի արարք է։
Կարեն Կարապետյան