Ֆրանսիայի նախագահ Էմանուել Մակրոնը երեքշաբթի երեկոյան «France 2»-ի եթերում հայտարարել է, որ մտադիր է արգելել 15 տարեկանից փոքր երեխաներին օգտվել սոցիալական ցանցերից, եթե ԵՄ-ն նման որոշում չընդունի։

«Ես մեզ մի քանի ամիս ժամանակ եմ տալիս համաեվրոպական մոբիլիզացիայի հասնելու համար։ Հակառակ դեպքում (...) մենք դա կանենք Ֆրանսիայում։ Մենք չենք կարող սպասել», - ասել է Մակրոնը։

«Մենք պետք է արգելենք սոցիալական ցանցերը 15 տարեկանից փոքրերի համար», - ասել է Մակրոնը՝ կապված հունիսի 10-ին Վեր-Մարն դեպարտամենտի Նոժան կոմունայում քոլեջի աշխատակցի սպանության հետ, որը կատարվել էր 14-ամյա դեռահասի կողմից։

Ավելի վաղ ֆրանսիական լրատվամիջոցները հայտնել էին անչափահաս մարդասպանի ձերբակալման մասին, որը ուսանողների պայուսակների խուզարկության ժամանակ դանակով հարձակվել էր 31-ամյա կրթական օգնականի վրա։ Կինը մահացել էր ստացած վնասվածքներից։