ԱՄՆ նախագահ Դոնալդ Թրամփը կարծում է, որ հավանաբար անհրաժեշտ է թույլ տալ Ուկրաինային և Ռուսաստանին «մի փոքր կռվել» նախքան խաղաղության համաձայնագիր կնքելը: Ամերիկացի առաջնորդն այս մասին ասել է Գերմանիայի կանցլեր Ֆրիդրիխ Մերցի հետ հանդիպման ժամանակ, հաղորդում է Bloomberg-ը:
Թրամփը բացատրել է, որ Ռուսաստանի առաջնորդ Վլադիմիր Պուտինի հետ իր վերջին զրույցի ժամանակ նա համեմատել է Ուկրաինայում հակամարտությունը «երկու երեխաների կռվի հետ այգում»: Սպիտակ տան ղեկավարի խոսքով՝ նման իրավիճակներում «ավելի լավ է թույլ տալ նրանց մի փոքր կռվել, նախքան նրանց բաժանելը», քանի որ կողմերը «ատում են միմյանց և չեն ուզում դադարեցնել»:
«Երբեմն թույլ ես տալիս նրանց մի փոքր կռվել: Դա տեսնում ես հոկեյում, դա տեսնում ես սպորտում, մրցավարները թույլ են տալիս նրանց մի քանի վայրկյան կռվել, թող նրանք մի փոքր կռվեն, նախքան նրանց բաժանելը», - ասել է ամերիկացի առաջնորդը:
ԱՄՆ նախագահը հավելել է, որ պատրաստ է պատժել երկու երկրներին, եթե չի հավատում, որ նրանք անկեղծորեն նվիրված են խաղաղությանը: Թրամփը նաև ասել է, որ եթե Ռուսաստանը «անցնի սահմանը», Վաշինգտոնը «շատ կոշտ» կգործի Մոսկվայի դեմ: