ԱՄՆ նախագահ Դոնալդ Թրամփն ասել է, որ Իլոն Մասկը «խելագարվել է» և որ երկրում երրորդ կուսակցություն ստեղծելու գաղափարը «ծիծաղելի է»։
«Կարծում եմ՝ ծիծաղելի է երրորդ կուսակցություն ստեղծելը։ Մենք հսկայական հաջողությունների ենք հասել Հանրապետական կուսակցության հետ։ Դեմոկրատները կորցրել են իրենց ճանապարհը, բայց մենք միշտ ունեցել ենք երկկուսակցական համակարգ։ Երրորդ կուսակցություն ստեղծելը միայն կավելացնի խառնաշփոթը։ Թվում է, թե համակարգը իրականում նախատեսված է երկու ուժերի համար։ Երրորդ կուսակցությունները երբեք չեն աշխատել՝ նա կարող է զվարճանալ, բայց ես կարծում եմ՝ դա ծիծաղելի է», - լրագրողներին ասել է ԱՄՆ նախագահը։
Դոնալդ Թրամփը նաև գրառում է նվիրել Իլոն Մասկին «Truth Social»-ում։
«Ցավալի է տեսնել, թե ինչպես է Իլոն Մասկը լիովին կորցնում իր միտքը և վերածվում աղետի ընդամենը հինգ շաբաթվա ընթացքում։ Նա նույնիսկ ուզում է ստեղծել երրորդ քաղաքական կուսակցություն՝ չնայած այն հանգամանքին, որ նման նախագծերը երբեք հաջող չեն եղել Միացյալ Նահանգներում։ Մեր համակարգը պարզապես չի թվում, թե նախատեսված է նրանց համար։ Միակ բանը, որին հանգեցնում են երրորդ կուսակցությունները, լիակատար քաոսն ու փլուզումն է։ Եվ մենք բավականաչափ քաոս ունենք արմատական ձախակողմյան դեմոկրատների հետ, ովքեր կորցրել են իրենց առողջ բանականությունն ու վստահությունը»:
Սպիտակ տան ղեկավարը նաև ասել է, որ Մասկը տեղյակ է եղել էլեկտրական մեքենաների խթանները չեղարկելու ծրագրերի մասին և ասել է, որ ինքը դեմ չէ։ Բացի այդ, ըստ Թրամփի, միլիարդատերը խնդրել է իր ընկերոջը նշանակել NASA-ի ղեկավար, ինչը «զարմացրել է»։