Ես հայտարարել եմ և վերահաստատում եմ, որ «Հայրենիք» կուսակցությունը 2026 թվականի ընտրություններին միայնակ է մասնակցելու՝ առանց որևէ դաշինքի։ Այդ մասին ԼուրջCast հաղորդման ընթացքում ասել է ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։
Նրա խոսքով՝ իրենք միայնակ են գնում ընտրությունների, քանի որ կուսակցությունն արդեն բավականաչափ փորձ ու գիտելիք ունի։
«Երբ 2020 թվականին ես և իմ ընկերները ստեղծեցինք կուսակցություն և սկսեցինք զբաղվել քաղաքականությամբ, մենք փորձ չունեինք, համակարգ չունեինք, գիտելիք չունեինք։ Դրա համար էլ որոշակի բացթողումներ ու սխալներ են եղել։ Բայց այս տարիների ընթացքում մեր թե՛ կողմնակիցների, թե՛ կուսակիցների քանակը շատացել է, այսօր մեծ հոսք կա դեպի կուսակցություն։ Ի դեպ, դա սկզբում ինձ համար շատ զարմանալի էր, մենք մարդկանց չէինք առաջարկել գալ ու դառնալ կուսակցական, իրենք իրենց ոտքով գալիս ու անդամագրվում էին։ Դա է ինձ ստիպել, որ Հայաստանի 62 խոշոր համայնքներում մենք սկսել ենք գրասենյակներ հիմնել։ Համայնքների կեսում արդեն գրասենյակներ ունենք, և գործընթացը շարունակվում է»,- ներկայացրել է Արթուր Վանեցյանը։
Կուսակցության նախագահը նշել է, որ երիտասարդների հետ կապված ծրագրեր ևս իրենք իրականացնում են։
«Ծրագրերից մեկը, որ հենց հիմա անում ենք, կոչվում է «Ճանաչի՛ր հայրենիքդ»․ յուրաքանչյուր շաբաթ, կամ տասը օրը մեկ երիտասարդների մի խումբ, որը ոչ մի կապ չունի կուսակցության հետ, գնում է պատմական վայրեր, հուշարձաններ, և մեր ընկերները պատմում են այդ տարածքների մասին։ Այդ արշավախումբը ղեկավարում են իրանագետ Վարդան Ոսկանյանն ու քաղաքագետ Խաչիկ Գալստյանը։ Այդ առումով շատ մեծ ակտիվություն կա»,- ասել է նա։
Արթուր Վանեցյանի խոսքով՝ մարզերում ևս բավականին ակտիվ ծրագրեր են իրականացվում։
«2026 թվականի ընտրություններին մենք պետք է պատրաստվենք՝ չբացառելով ինչ-որ իրավիճակում փողոցով այս իշխանությանը հեռացնելը։ Բայց եթե չստացվի նախքան ընտրությունները սրանց քշել, պետք է 2026-ի ընտրություններին գնալ պատրաստված։ Որ եթե ընտրություններից հետո, Աստված չանի, էլի նույն վիճակում հայտնվենք, մեզ չհարցնեն, թե ինչո՞ւ չէինք պատրաստվել ընտրություններին»,- ամփոփել է խոսքը «Հայրենիք» կուսակցության նախագահը։