Ֆրանսիան ողջունել է Վաշինգտոնում ԱՄՆ-ի հովանու ներքո Ադրբեջանի և Հայաստանի միջև հարաբերությունների կարգավորմանն ուղղված համաձայնության մասին հայտարարությունը։
«ԱՄՆ-ի մասնակցությամբ ձեռք բերված արդյունքները նշանավորում են որոշիչ առաջընթացի քայլ։ Հայաստանի և Ադրբեջանի միջև խաղաղության պայմանագրի հնարավորինս շուտ ստորագրումն ու վավերացումը կավարտի այս գործընթացը։ Այս համածիրում Ֆրանսիան աջակցում է կողմերի համատեղ կոչին՝ սկսելու ԵԱՀԿ Մինսկի խմբի կառույցների լուծարման գործընթացը»,- ասված է երկրի արտաքին գործերի նախարարության հայտարարության մեջ։
Ըստ ԱԳՆ-ի՝ Հայաստանի և Ադրբեջանի միջև հարաբերությունների կարգավորումը, տարածաշրջանային փոխկապակցվածության զարգացումը և սահմանների վերաբացումը՝ պետությունների տարածքային ամբողջականության և ինքնիշխանության, ինչպես նաև 1991 թվականի Ալմա-Աթայի հռչակագրով ամրագրված սկզբունքների պահպանմամբ, պետք է հնարավորություն տա Հարավային Կովկասին վերածվելու խաղաղության և բարեկեցության գոտու՝ ի շահ տարածաշրջանի ժողովուրդների։
«Իր եվրոպացի գործընկերների հետ Ֆրանսիան շարունակելու է ակտիվորեն նպաստել այդ նպատակին, մասնավորապես՝ Եվրոպական քաղաքական համայնքի շրջանակներում», - նշված է հայտարարության մեջ։